އެނބުރި އަންނަން ކުޅުންތެރިން ތިބީ ބިރުން: އަގުއޭރޯ

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން އެނބުރި ކުޅުމުގެ ތެރެއަށް އަންނަށް ކުޅުންތެރިން ތިބީ ބިރުން ކަމަށް މެންޗެސްޓަރ ސިޓީގެ ފޯވަރޑް ސާޖިއޯ އަގުއޭރޯ ބުނެފިއެވެ.

މިދިޔަ މަރޗު މަހުގެ 8 ވަނަ ދުވަހު އިނގިރޭސި ޕްރިމިއަރ ލީގުގެ ކުޅުން މެދުކަނޑާލިއިރު، ޖޫން މަހު އިނގިރޭސި ޕްރިމިއަރ ލީގު އަލުން ފަށަން އަންނަނީ ތައްޔާރުވަމުންނެވެ. އެގޮތުން މެދުކަނޑާލާފައިވާ ޕްރިމިއަރ ލީގުގެ މެޗުތައް ސަޕޯޓަރުން ނުވައްދާ ކުޅޭގޮތަށް ޖޫން މަހުގެ 8 ވަނަ ދުވަހު ފަށަ،އި ޖުލައި މަހުގެ 27 ވަނަ ދުވަހަށް ލީގު އެއްކޮށް ފުރިހަމަކުރަން އަންނަނީ މަސައްކަތް ކުރަމުންނެވެ. އެގޮތުން ލީގު ކުރިއަށް ގެންދިޔުމަށް ކްލަބުތަކުން މިހާރު ވަނީ އެއްބަސްވެފައެވެ.

އާޖެންޓީނާގެ ޓީވީއަކަށް ދިން އިންޓަވިއުއެއްގައި އުމުރުން 31 އަހަރުގެ އަގުއޭރޯ ބުނީ މި ދަނޑިވަޅުގައި ދަރިންނާއި އާއިލާއާ ދުރަށްގޮސް، ކުޅުމުގެ ތެރެއަށް އެނބުރި އަންނަން ގިނަ ކުޅުންތެރިން ތިބީ ބިރުން ކަމަށެވެ. އަދި އަލާމާތެއް ނުފެނިވެސް މި ވައިރަހަށް މީހުން ޕޮޒިޓިވްވަމުންދާ ކަމަށާއި، އެހެންކަމުން ގިނަ ކުޅުންތެރިން ތިބީ އަމިއްލަ ގޭގައި ލޮކްޑައުން ވެގެން ކަމަށެވެ.

ރިޕޯޓުތައް ބުނާ ގޮތުން މި މަހުގެ 18 ވަނަ ދުވަހުން ފެށިގެން ޕްރިމިއަރ ލީގުގެ ކްލަބުތައް ތަމްރީނުތައް ފަށާނެއެވެ. މީގެ ކުރިން ޓޮޓެންހަމް ހޮޓްސްޕަރ އާއި އާސެނަލާއި ބްރައިޓަން އަދި ވެސްޓް ހޭމް ޔުނައިޓެޑުން ވަނީ ކުޅުންތެރިން އެކަނި ތަމްރީނު ހެދުމުގެ ފުރުސަތު ހުޅުވާލާފައެވެ.

މަރޗު މަހުގެ 13 ވަނަ ދުވަހު ޕްރިމިއަރ ލީގު ކުޅުން ހުއްޓާލިއިރު، ލީގުގައި ވާދަކުރާ 20 ޓީމުގެ ތެރެއިން 16 ޓީމަކަށް ބާކީ އޮތީ 9 މެޗެވެ. ދެން އޮތް 4 ޓީމަށް 10 މެޗު އެބައޮތެވެ. ލީގު މެދުކަނޑާލިއިރު އެއްވަނައިގައި 82 ޕޮއިންޓާއެކު ލިވަޕޫލް އޮތީ 25 ޕޮއިންޓުގެ ލީޑަކާ އެކު އެވެ. ލީގު ކަށަވަރުކުރަން ލިވަޕޫލަށް ބޭނުންވަނީ އެންމެ 6 ޕޮއިންޓެވެ.