ކޮވިޑް-19އާ ގުޅިގެން ރާއްޖެއިން ހެދި ޕްރިޑިކްޝަން ގްރާފް ރީ މޮޑަލް ކުރަނީ
2 މެއި 2020 | ހޮނިހިރު 08:56ކޮވިޑް-19ގެ ޑާޓާ ތަކެއް ލިބިފައިވޭ
އެންއޯއީސީގައި ބޭއްވި ބައްދަލުވުމެއްގައި، ޓާސްކްފޯސްގެ ތަރުޖަމާނު މަބްރޫކް އަޒީޒު ވާހަކަދައްކަވަނީ
ކޮވިޑް-19އާ ގުޅިގެން ރާއްޖޭގެ ހާލަތުގެ މައްޗަށް އެކުލަވާލާފައިވާ ޕްރިޑިކްޝަން ގްރާފް ރީ މޮޑަލް ކުރުމުގެ މަސައްކަތް ކުރިއަށްދާ ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ހުކުރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ރާއްޖެއިން މިހާރު ކޮވިޑް-19އަށް ޕޮޒިޓިވްވެފައިވާ ކޭސްތައް ފެނުމާއި ގުޅިގެން އިތުރު ޑާޓާ ލިބިފައިވާ ކަމަށެވެ.
އެހެންކަމުން ކުރިން ހެދި ޕްރިޑިކްޝަން ގްރާފް ރީ މޮޑަލް ކުރުމުގެ މަސައްކަތައް ކުރިއަށްދާ ކަމަށް މަބްރޫކް ވިދާޅުވިއެވެ. އަދި ވިދާޅުވީ އެމަސައްކަތް ނިމުނުހާ އަވަހަށް މިހަފުތާގެ ތެރޭގައި ޢާންމު ކުރައްވާނެ ކަމަށެވެ.
ކޮވިޑް-19އާ ގުޅިގެން ރާއްޖޭގެ ޙާލަތުގެ މައްޗަށް ފުރަތަމަ ހެދި ޕްރިޑިކްޝަން ގްރާފުން ދައްކާ ގޮތުގައި ރާއްޖޭގައި، މުޖުތަމަޢުގެ ތެރޭގައި ބަލި ފެތުރިއްޖެނަމަ ޖުމުލަކޮށް މާލެ ޞަރަޙައްދުން 46،627 އަށްވުރެ ގިނަ މީހުންނަށް ބަލި ޖެހޭނެ ކަމަށް ލަފާ ކޮށްފައިވެއެވެ. އަދި އަތޮޅުތަކުން 51،874 މީހުން ބައްޔަށް ޕޮޒިޓިވްވާނެކަމަށް ބެލެވޭއިރު، ޖުމުލަ 98،501 މީހުންނަށް ކޮވިޑް-19 ޖެހެނޭކަމަށް ލަފާކޮށްފައިވެއެވެ. އަދި، ކޮވިޑް-19 އާއި ގުޅިގެން ރާއްޖެއިން ރައްކާތެރިވުމުގެ ގޮތުން އެއްވެސް ފިޔަވަޅެއް ނާޅައިފިނަމަ ރާއްޖެއިން 10،891 މީހުން މަރުވާނެކަމަށް ލަފާކޮށްފައިވެއެވެ.
މީގެ އިތުރުން އެއްވެސް ފިޔަވަޅެއް ނާޅައިފި ނަމަ ގާތްގަނޑަކަށް ދުވާލެއްގެ މައްޗަށް އިތުރަށް އެތައް ޢަދަދަކަށް ވައިރަސްއަށް މީހުން ޕޮޒިޓިވްވާނެ ކަމަށް ލަފާކޮށްފައިވާއިރު، މުޖުތަމަޢުގެ ތެރޭގައި އުޅޭ މީހަކަށް ބަލި ޖެހޭތާ 45 ވަނަ ދުވަހު އެކަނި ވެސް ގާތްގަނޑަކަށް 5،000 މީހުން އަލަށް ބައްޔަށް ޕޮޒިޓިވް ވާނެ ކަމަށް ލަފާކޮށްފައިވެއެވެ. އެއީ އެއް ދުވަހެއްގައި އެންމެ ގިނައިން ޕޮޒިޓިވް ކޭސް ރާއްޖެއިން ފެނިދާނެ ކަމަށް ލަފާކުރާ ޢަދަދެވެ.
ކޮވިޑް-19 ކޮންޓްރޯލް ކުރުމަށް ސަރުކާރުން ދަނީ ގިނަ މަސައްކަތްތައް ކުރަމުންނެވެ. އެގޮތުން ޢާންމު ޞިއްޙަތުގެ ނުރައްކަލުގެ ޙާލަތު އިޢުލާނުކޮށް މާލެސިޓީ ވަނީ ފުރަބަންދުކޮށްފައެވެ.
