ކޮވިޑް-19 ޖެހިގެން މިހާރު ފަރުކޮޅުފުށީގައި ފަރުވާދެމުންދާ މީހުންގެ ތެރެއިން 28 މީހަކު ބަނޑޮހަށް ބަދަލުކުރާނެ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

މީގެކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކު ވިދާޅުވީ ފަރުކޮޅުފުށި ކަރަންޓީނު ފެސިލިޓީގައި ތިބި މީހުން ބަނޑޮހަށް ބަދަލު ކުރަނީ އެ ފެސިލިޓީގައި ދިމާވި ފެންލީކު ވުމާއި ކަރަންޓުގެ މައްސަލަތަކުގެ ސަބަބުން ކަމަށެވެ. ހަތެއް ޕޮއިންޓް ތިނެއް މިލިއަން ރުފިޔާ ޚަރަދުކޮށްގެން ފަރުކޮޅު ފުށީގައި ގާއިމުކުރި ކަރަންޓީނު ފެސިލިޓީ މަރާމާތު ކުރުމަށްފަހު އަލުން ބޭނުންކުރަން ފަށާފައިވާއިރު އެ ފެސިލިޓީގައި ތިިބި ބަލި މީހުން ވަނީ އެތަނުގެ ހާލަތާ މެދު ކަންބޮޑުވުން ފާޅު ކޮށްފަ އެވެ.

ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ބަނޑޮހަށް މިރޭ ބަދަލުކުރަނީ ފަރުކޮޅުފުށީގައި ތިބި މީހުންގެ ތެރެއިން ސިއްހީ ހާލަތު ރަނގަޅު މީހުންކަމަށެވެ.

މަބްރޫކް ވިދާޅުވީ ފަރުކޮޅުފުށި މަރާމާތު ކުރުމަށްފަހު އެތަން ބޭނުންކުރަން ފަށާނެކަމަށެވެ. ފަރުކޮޅުފުއްޓަކީ އެންމެ ފުރަތަމަ ރާއްޖޭގައި ގާއިމުކުރެވުނު ކަރަންޓީނު ފެސިލިޓީތަކުގެ ތެރެއިން ފެސިލިޓީއެކެވެ. އެފެސިލިޓީ މަރާމާތު ކުރުމަށްފަހު ހުޅުވާފައިވަނީ 50 އެނދާއި، 2 އައިސީޔޫ އެނދުގެ އިތުރުން، 1 ވެންޓިލޭޓަރުގެ ޚިދުމަތާއެކުއެވެ.

ފަރުކޮޅު އައިސޮލޭޝަން ޚާއްޞަ ކޮށްފައިވަނީ ޕޮޒިޓިވް މީހުންގެ ތެރެއިން "ހައި ރިސްކް" މީހުންނަށެވެ. ޑޮކްޓަރުން ގާތުން މޮނިޓަރ ކުރަން ބޭނުންވާ ބަލި މީހުންނާއި، ރޯގާގެ އަލާމަތްތައް ބޮޑަށް ފެންނަ މީހުން ފަރުކޮޅު އައިސޮލޭޝަނަށް ގެންނާނެ ކަމަށް މަބްރޫކު ވަނީ މީގެކުރިން ވިދާޅުވެފަ އެވެ.

ރާއްޖޭގެ އެކި ހިސާބުތަކުގައި 16 ށް ވުރެ ގިނަ ކަރަންޓީނު ފެސިލިޓީތައް ގާއިމު ކޮށްފައިވާއިރު އުތުރާއި ދެކުނުގައިވެސް ވަނީ އެހިސާބުތަކުން ކޮވިޑް-19 އަށް ޕޮޒިޓިވްވާ މީހުންނަށް ފަރުވާދިނުމަށް ކަރަންޓީނު ފެސިލިޓީތައް ގާއިމުކޮށްފަ އެވެ.

މިހާތަނަށް ރާއްޖެއިން 481 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ.