މާލޭގައި ރަށަށް ނުދެވި ތާށިވެފައި ތިބި ބ. ކަމަދޫ ރައްޔިތުންގެ ގެނައުމުގެ މަސައްކަތް ކުރަމުންދާ ކަމަށާއި، ރަށަށް ގެނައުމަށްފަހު، 14 ދުވަސް ވަންދެން އެމީހުން ބައިތިއްބާނީ ގެސްޓްހައުސް ތަކުގައި ކަމަށް އެރަށުގެ ކައުންސިލުން ބުނެފިއެވެ.
ރާއްޖެޓީވީއަށް ދިން އިންޓަވިއުއެއްގައި ކަމަދޫ ކައުންސިލްގެ ރައީސް އަޙްމަދު ސާޖިދު ވިދާޅުވީ ރަށުގެ ޢާންމު ޙާލަތު ރަނގަޅު ކަމަށެވެ. ނަމަވެސް ކޮވިޑް-19ގެ ނުރައްކާ ބޮޑުވެފައިވާ މިދަނޑިވަޅުގައި ރައްކާތެރިކަމުގެ ގިނަ ފިޔަވަޅުތަކެއް އަޅަމުންދާ ކަަމަށެވެ.
މާލޭގައި ތިބި ކަމަދޫ ރައްޔިތުންގެ ގެނައުމުގެ މަސައްކަތަށް އަލިއަޅުއްވާލައްވާ ސާޖިދު ވިދާޅުވީ ބޭސް ފަރުވާއަށާއި، އެހެނިހެން ބޭނުންތަކަށް ގޮސް ތިބި ބައެއް މީހުން މާލޭގައި ތާށިވެފައިވާ ކަމަށެވެ. އަދި އެމީހުންގެ ލިސްޓު ހެދިފައިވާ ކަމަށް ސާޖިދު ވިދާޅުވިއެވެ.
ސާޖިދު ވިދާޅުވީ ކައުންސިލްތަކުން ގެސްޓްހައުސްތަކާ މަޝްވަރާ ކޮށްގެން މިހާރު ބައެއް ގެސްޓްހައުސްތައް ހަމަޖެހިފައިވާ ކަމަށާއި، މާލެއިން ގެނެވޭ މީހުން 14 ދުވަސް ވަންދެން ބައިތިއްބާނީ ގެސްޓުހައުސްތަކުގައި ކަމަށެވެ. ގެތަކުގައި ކައްކާ އެއްޗެހި ޓާސްކްފޯސް މެދުވެރިކޮށް ފޯރުކޮށްދޭނެ އިންތިޒާމު ހަމަޖައްސާފައިވާ ކަމަށް އޭނާ ވިދާޅުވިއެވެ.
މީގެ އިތުރުން ސާޖިދު ވިދާޅުވީ ކުއްލި ޙާލަތުގައި ވެސް ޢަމަލުކުރާނެ ޙާލަތަށް ރަށް ތައްޔާރުވެފައިވާ ކަމަށެވެ. އެގޮތުން އައިސޮލޭޓް ކުރަންޖެހޭ ޙާލަތުގައި ވެސް ވަކި ރޫމްތަކެއް ހަމަޖެހިފައިވާ ކަމަށް ސާޖިދު ވިދާޅުވިއެވެ. އަދި ވިދާޅުވީ ރިސޯޓުތަކާއި ގުޅިގެން އަންގި، ސެނިޓައިޒަރ، މާސްކް ފަދަ އެއްޗެހި ހޯދާފައިވާ ކަމަށެވެ. ނަމަވެސް ބޭނުންވާ މިންވަރަށް ނެތުމުން ފްރޮންޓްލައިންގައި މަސައްކަތް ކުރާ މީހުންނަށް ޚާއްސަކޮށް އެތަކެތި ބަހައްޓާފައިވާ ކަމަށް ސާޖިދު ވިދާޅުވިއެވެ.
ބިދޭސީންގެ ޙާލަތަށް އަލިއަޅުއްވާލައްވާ ސާޖިދު ވިދާޅުވީ އެރަށް ކައިރީގައި ގިނަ ރިސޯޓުތަކެއް ހުރުމާއެކު އެކިއެކި މަސައްކަތުގައި ޙަރަކާތްތެރިވާ ބިދޭސީން ގިނަ ކަމަށެވެ. އެގޮތުން އެމީހުންނަށް ޚާއްޞަކޮށްގެން ހޭލުންތެރި ކުރުމުގެ ޕްރޮގުރާމުތައް ކުރިއަށް ގެންދެވިފައިވާ ކަމަށް ސާޖިދު ވިދާޅުވިއެވެ. އަދި ބިދޭސީން ދިރިއުޅޭ ތަންތަނަނަށް ޞިއްޙީ މަރުކަޒުގެ ބޭފުޅުން ޒިޔާރަތްކުރައްވައި އަތްދޮންނަންވާ ގޮތާއި، އިޖްތިމާއި ގައިދުރުކަން ބަހައްޓެމުގެ މުހިންމު ކަމާއި، ބަލީގެ ނުރައްކާތެރިކަން ކިޔައިދެއްވާފައިވާ ކަަމަށެވެ. ކަމަދޫ ކައުންސިލުން މިހާރު ވަނީ ބިދޭސީ ދަފްތަރެއްވެސް އެކުލަވާލާފައެވެ.
ރަށުގެ ޢާންމު ޙާލަތު ރަނގަޅު ނަމަވެސް ރައްކާތެރިކަމުގެ މުހިންމު ފިޔަވަޅުތަކެއް އަޅާފައިވާކަން ފާހަގަކުރައްވައި ސާޖިދު ވިދާޅުވީ ޢާންމުން އެއްވެ އުޅުން މަނާކޮށް، ޖޯލިފަތިތައް ނަގާވާފައިވާ ކަމަށެވެ. ފިހާރަ ހުޅުވާ ވަގުތަށް ބަދަލު ގެނެސް، ވިޔަފާރި ކުރާ އުޞޫލަށް ބަދަލު ގެނެސްފައިވާ ކަމަށް ސާޖިދު ވިދާޅުވިއެވެ.
ފިހަރާތަށް މެންދުރުފަހު 1:00ން 2:00ށް، ހަވީރު 4:00ން 5:00ށް، ރޭގަނޑު 9:00ން 10:00ށް ހުޅުވާފަ ހުންނާނެ. ޑެލިވަރީގެ ޚިދުމަތްތައް އަބަދުވެސް ކުރިއަށްދާނެ. ރެސްޓައުރެންޓް އަދި ކެފޭ ގަޑިޔާ ތަކުން ހަމައެކަނި ލިބޭނީ ޑެލިވަރީގެ ޚިދުމަތް. އެހެން ނޫން ނަމަ އެތަންތަނަށް ގޮސް އާންމު ތިބޭނެ ކަމަށް ގަބޫލުކުރެވޭތީ މިގޮތަށް ނިންމީ.ކައުންސިލްގެ ރައީސް އަހުމަދު ސާޖިދު
ސާޖިދު ވިދާޅުވީ ޓާސްކްފޯސްއިން އަންގާ އެންގުންތައް ކައުންސިލުން ތަންފީޒު ކުރާ ކަމަށެވެ. މަސައްކަތްތައް ކުރިއަށް ދަނީ ސޯޝަލް ސަޕޯޓް ޑެސްޑް އަދި ސިއްހީ މަރުކަޒުގެ ބޭފުޅުންގެ ލަފައާ އިރުޝާދުގެ ދަށުން ކަމަށް ސާޖިދު ވިދާޅުވިއެވެ.
ސާޖިދު ވިދާޅުވީ ކޮވިޑް-19ން ރައްކާތެރިވުމަށް ކުރާ މަސައްކަތުގައި ރަށު ރައްޔިތުންގެ ފުރިހަމަ އެއްބާރުލުން ލިބޭ ކަމަށެވެ.
