''ކާވިޔާ'' ބޯޓުން ދަތުރުކުރި ހއ. ތަކަންދޫ ތިން މީހަކު ކޮވިޑް-19 އަށް ޕޮޒިޓިވް ވެއްޖެއެވެ.

ޕޮޒިޓިވްވި މީހުންގެ ތެރޭގައި ހިމެނެނީ ކުޑަ ކުއްޖެއްގެ އިތުރުން ދެ އަންހެނުންނެވެ. ތަކަންދޫއިން ބަޔަކު ޕޮޒިޓިވްވިކަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އެ ރަށަށް އަންގާފައިވާ ކަމަށް ރަށު ކައުންސިލްގެ ރައީސް އަހުމަދު ނިޔާޒް ވަނީ ރާއްޖެ.އެމްވީ އަށް ކަަށަވަރު ކޮށްދީފައެވެ. ނިޔާޒް ވިދާޅުވީ، ރަށުން ނެގި ސާމްޕަލްތަކުގެ ނަތީޖާ ޕޮޒިޓިވްވެފައިވާކަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހެނދުނު އަންގާފައިވާ ކަމަށެވެ.

އިހަވަންދޫ ކާވިޔާ ބޯޓް މާލެ އިން ފުރާފައި ވަނީ މި މަހުގެ 15 ވަނަ ދުވަހުއެވެ. އެ ބޯޓް ތަކަންދޫއަށް ގޮސްފައި ވަނީ މި މަހުގެ 16 ވަނަ ދުވަހު އެވެ. މާލެ ލޮކްޑައުން ކޮށްފައި ވަނީ ބޯޓް މާލެ އިން ފުރި ދުވަހު ކަމަށްވާ މިމަހުގެ 15 ވަނަ ދުވަހުއެވެ.

ކާމިޔާ ބޯޓުން ތަކަންދޫ އަށް ދިޔަ 37 މީހެއްގެ ސާމްޕަލް ނެގިއިރު އަދި ނަތީޖާ ލިބިފައި ވަނީ ބައެއް މީހުންގެ ކަމަށް ނިޔާޒް ވިދާޅުވިއެވެ. ތަަކަންދޫން ތިން މީހަކު ޕޮޒިޓިވްވުމުން މޮނިޓަރިންގެ ހާލަތަށް އެ ރަށް ގެނެސްފައިވާއިރު ޕޮޒިޓިވްވި މީހުން އެކަހެރި ކުރުމުގެ މަސައްކަތް އެ ރަށު ޓާސްކްފޯހުން ކުރަމުންދާ ކަމަށް ކައުންސިލް އިން ވަނީ ހާމަކޮށްފައެވެ.

މައުލޫމާތު ލިބިފައިވާ ގޮތުގައި ކާވިޔާ ބޯޓުން ދަތުރު ކުރި ގިނަ މީހުންނަކީ ތަކަންދު އަށް ނިސްބަތްވާ މީހުންނެވެ. މިބޯޓުން ދަތުރު ކުރި އުލިގަމު، ތުރާކުނު އަދި ހޯރަފުށީ މީހުންގެ ތެރެއިން ޓެސްޓް ހެދި އެންމެންގެ ނަތީޖާވަނީ ނެގެޓިވް ވެފައެވެ.

ތަކަންދޫން ޕޮސިޓިވް ވި މީހުން ހައިޑްއަވޭގައި ގާއިމް ކޮށްފައިވާ އައިސޮލޭޝަން ފެސިލިޓީ އަށް ގެންދިއުމުގެ މަސައްކަތް ހއ. އަތޮޅު ހޮސްޕިޓަލުން ކުރިއަށް ގެންދާ ކަމުގެ މައުލޫމާތު ވަނީ ލިބިފައެވެ.

ކާވިޔާ ބޯޓުން ތަކަންދޫއަށް ދަތުރު ކުރި މީހުންގެ ސާމްޕަލް ނަގާފައިވަނީ މި ހުސްވި މަހުގެ 27 ދުވަހުގެ ރޭގެ ވަގުތެއްގައި އެ ރަށަށް އަތޮޅު ހޮސްޕިޓަލުގެ ޓީމެއް ގޮސްގެންނެވެ.