ޓާސްކްފޯހުގެ ހުއްދައާއި ނުލާ ޑިންގީއެއްގައި ފުރަން އުޅުނު 3 މީހަކު ހިމަންދޫން ހައްޔަރުކޮށްފި!
1 މެއި 2020 | ހުކުރު 08:40މައްސަލއިގައި ހައްޔަރުކުރީ 3 ފިރިހެނުން
އއ. ހިމަންދޫ
ޓާސްކްފޯހުގެ ހުއްދައާ ނުލާ ޑިންގީއެއްގައި ފުރަން އުޅުނު 3 މީހަކު އއ. ހިމަންދޫން ހައްޔަރުކޮށްފިއެވެ.
މިކަމާއި ގުޅިގެން މަޢުލޫމާތު ދެމުން ފުލުހުން ބުނެފައިވަނީ، ބުރާސްފަތި ދުވަހުގެ ރޭ 11:45 ހާއިރު އއ.ހިމަންދޫ ޓަސްކް ފޯހުގެ ހުއްދަނެތި ރަށުން ބޭރަށް ދާން އުޅުނު ކަމުގެ ތުހުމަތުގައި 3 ދިވެހިން ހައްޔަރުކޮށްފައިވާކަމަށެވެ. ރާއްޖޭގައި ހަލުވިކަމާއެކު ކޮވިޑް-19 ފެތުރެން ފަށައިފައިވާތީ ރައްކާތެރިކަމުގެ ފިޔަވަޅެއްގެ ގޮތުން ޑިރެކްޓަރ އޮފް ޕަބްލިކް ހެލްތު، މައިމޫނާ އަބޫބަކުރު ސޮއިކުރައްވާ ނެރުނު ބަޔާނުން ވަނީ ހުއްދަނެތި އެއް ރަށުން އަނެއް ރަށަށް އަރާ ފޭބުން މަަނާކޮށްފައެވެ.
ފުލުހުން ބުނެފައިވަނީ، މި 3 މީހުން ޑިންގީއެއްގައި ރަށުން ފުރިތަނާ ޓާސްކްފޯހަށް ފެނިގެން ޓޯޗަކުން ޑިންގީއަށް އަލިކުރުމުން އެމީހުން އެނބުރި ސިއްރުން ރަށަށް އަރާފައިވާކަމަށެވެ. މި މައްސަލައިގައި އުމުރުން 28، 26 އަދި 32 އަހަރުގެ މީހަކު ވަނީ ކޯޓު ޢަމުރެއްގެ ދަށުން ހައްޔަރުކޮށްފައެވެ.
ފުލުހުން ދަނީ މައްސަލަ އިތުރަށް ތަޙުޤީޤު ކުރަމުންނެވެ.
