ކޮވިޑް-19: އުމުރުން ދުވަސްވީ މީހުންގެ ސާމްޕަލް އަވަހަށް ނެގޭނެގޮތް ހަދަނީ
1 މެއި 2020 | ހުކުރު 07:02މިހާރު ކުރިއަށް ދަނީ އެސްއޯޕީ ފައިނަލް ކުރުމުގެ މަޝްވަރާތައް
ކޮވިޑް-19 އަށް ސާމްޕަލް ޓެސްޓްކުރަނީ
ކޮވިޑް-19 ރޯގާ އާގުޅިގެން، އުމުރުން ދުވަސްވީ މީހުންގެ ސާމްޕަލް އަވަހަށް ނެގޭނެ ގޮތްތަކަކާ މެދު މަޝްވަރާ ކުރަމުންދާ ކަމަށް ކޮވިޑް-19ގެ ޓާސްކްފޯސްގެ ތަރުޖަމާނު މަބްރޫކު އަޒީޒު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މަބްރޫކު ވިދާޅުވީ އުމުރުން ދުވަސްވީ މީހުންނާއި ދިގުމުއްދަތަށް ބޭސް ކުރަމުންދާ މީހުންނަކީ ކޮވިޑް-19 ރޯގާ ޖެހުުމުގެ ފުރުޞަތު ބޮޑު މީހުން ކަމަށް ފެންނާތީ، ކޮވިޑް-19 އަށް ޝައްކުކުރެވޭ އެފަދަ މީހުންގެ ސާމްޕަލް ވީއެންމެއަވަހަކަށް ނަގާ، ޓެސްޓްކުރެވޭނެ ރަނގަޅު އިންތިޒާމުތަކެެެއް ހަމަޖެއްސުމަށް މަޝްވަރާ ކުރަމުން އަންނަކަމަށެވެ.
މަބްރޫކް ވިދާޅުވީ، އެކަމާ ގުޅޭ ރަނގަޅު އުޞޫލެއް ޤާއިމުކުރުމުގެ މަސައްކަތް ކަމާބެހޭ ފަރާތްތަކުން ކުރަމުންދާ ކަމަށާއި، މިހާރު އެކަން އޮތީ ނިންމުމުގެ މަރުޙަލާގައި ކަމަށެވެ.
ރާއްޖޭގައި މިހާތަނަށް ކޮވިޑް-19 ޖެހިގެން ނިޔާވެފައިވަނީ 83 އަހަރުގެ އަންހެނެކެވެ. ދުވަސްވީ މިމީހާ ދިރިއުޅުނު ގެއިން ކޮވިޑް-19 އަށް މީހަކު ޕޮޒިޓިވްވުމާއެކު އެގޭ އޮތީ މޮނިޓަރިންގގެ ޙާލަތުގައެވެ. މިހެންވެ އެންމެ އެކަށީގެންވާ ގޮތުގައި ފަރުވާދެވިފައި ނުވާކަމަށް ޢާއިލާއިން ތުހުމަތު ކުރަމުންދިޔައެވެ.
މިކޭސް އާ ގުޅިގެން އެއްވެސް ފަރާތެއްގެ އިހުމާލެއް އޮތްތޯ ބައްލަވާނެ ކަމަށް ހެލްތު މިނިސްޓަރު ޢަބްދުﷲ އަމީން ވަނީ ވިދާޅުވެފައެވެ.
ރާއްޖޭގައި ކޮވިޑް-19 އަށް 468 މީހަކު ޕޮޒިޓިވް ވެއްޖެއެވެ. މީގެތެރޭގައި ގިނައީ ބިދޭސީންނެވެ.
