ބިލު ނުދެއްކިއަސް މީޓަރުގައި ތަޅު ނާޅުވާނަން، ބިލު ދެއްކޭނެ ލުއި ގޮތްތަކެއް އެބަހުރި: ޝާހު
1 މެއި 2020 | ހުކުރު 06:45ބިލް ނުދެއްކޭ ފަރާތަތްކަށް ބިލް ބާހާލައިގެން ދެއްކޭނެ ޕޮލިސީއެއް ފާސްކޮށްފައިވާނެ
އެމްޑަބްލިއުއެސްސީގެ ފަރާތުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ކުރީގެ ފެންބިލު ނުދެއްކި ތިބި ފަރާތްތަކަށް ބަހާލައިގެން ބިލު ދެއްކޭނެ އިންތިޒާމު ހަމަޖައްސައިފައިވާކަމަށް އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހް ވިދާޅުވެއްޖެއެވެ.
ކޮވިޑް-19ގެ ބަލިމަޑުކަމުގެ ސަބަބުން މާލީ ގޮތުން ގިނަ ފަރާތްތަކަށް ދަތިތައް ކުރިމަތިވެފައިވާ މި ދަނޑިވަޅުގައި ކުންފުނިން ކުރަމުންދާ މަސައްކަތާއި ގުޅޭގޮތުން ރާއްޖެޓީވީގެ ކޮވިޑް-19 ކަވަރޭޖްއަށް ދެއްވި ބަސްދީގަތުމެއްގައި ޝާހް ވިދާޅުވީ، ބިލު ނުދެއްކޭ ފަރާތްތަކަށް ޚާއްޞަ ޕޮލިސީއެއް ކަނޑައަޅާފައިވާކަމަށެވެ. އެގޮތުން، މިހާރުވެސް އެމްޑަބްލިއުއެސްސީން ބިލު ނުދެއްކޭ ފަރާތަތްކަށް ބިލު ބާހާލައިގެން ދެއްކޭނެ ޕޮލިސީއެއް ފާސްކޮށްފައިވާނެކަމަށް ޝާހު ވަނީ ފާހަގަކުރައްވާފައެވެ. އެގޮތުން، ޖޫން މަހުގެ 16 ވަނަ ދުވަހުގެ ނިޔަލަށް އެ ފުރުޞަތު އޮންނާނެކަމަށް ޝާހު ވިދާޅުވިއެވެ.
އޭނާާ ވިދާޅުވީ ކުރީގެ ބިލުތައް ނުދެއްކި ހުރި ފަރާތްތަކަށް، އެ ކުންފުންޏާއި މަޝްވަރާކޮށްގެން ސެޓެލްމަންޓް އެގްރީމަންޓް ހަދައި ބިލު ބަހައިލައިގެން ދެއްކޭނެ އިންތިޒާމު ހަމަޖައްސާފައިވާކަމަށެވެ. އަދި އެގޮތަށް ބިލިު ދައްކާ ފަރާތްތަކަށް ޖޫރީމަނާ މާފުކުރާ ގޮތަށް ނިންމާފައިވާކަމަށް ޝާހު ވަނީ ވިދާޅުވެފައެވެ. ޝާހު ވިދާޅުވީ މި ދަނޑިވަޅުގައިވެސް ހުރިހާ ރައްޔިތުންނަށްވެސް އެ ޚިދުމަތް ލިބިގެންދާނެކަމަށެވެ.
އިތުރަށް ވާހަކަދައްކަވަމުން ޝާހު ވިދާޅުވީ، ފެނަކީ ޢަސާސީ ޚިދުމަތަކަށް ވުމާއެކު މި ހައްސާސީ ދަނޑިވަޅުގައި ގޭބީސީތަކުން މި ދުވަސްވަރު ފެންމީޓަރުގައި ތަޅުއަޅުވާ ޑިސްކަނެކްޓް ކުރުމުގެ ވިސްނުމެއް ނުގެންގުޅުއްވާކަމަށާއި އެގޮތަށް ޢަމަލުނުކުރައްވާނެކަމަށެވެ. ޝާހު ވިދާޅުވީ، މި ވަގުތައް ޚިދުމަތް މެދުކަނޑާނުލި ނަމަވެސް ފެން ބޭނުންކުރާއިރުވެސް ފަހުން އެ ބިލުތައް ދައްކަންޖެހޭނެކަން ހަނދާންބަހައްޓައިގެން އެކަންތައް ކުރަން އިލްތިމާސްކުރާކަމަށެވެ.
