ޗެލްސީގެ ކުޅުންތެރިން އެނބުރި އިންގްލެންޑަށް އައުމަށް އަންގައިފި

ޗެލްސީގެ ބޭރު ކުޅުންތެރިން އަންނަ އާދީއްތަ ދުވަހުގެ ކުރިން އެނބުރި އިންގްލެންޑަށް އައުމަށް އަންގައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން މިދިޔަ މާޗު މަހުގެ 13 ވަނަ ދުވަހު އިނގިރޭސި ޕްރިމިއާ ލީގުގެ ކުޅުން މެދުކަނޑާލިއިރު، ޗެލްސީގެ ބައެއް ކުޅުންތެރިން ވަނީ އެ ކުޅުންތެރިންގެ އަމިއްލަ ގައުމަށް ގޮސްފައެވެ. އެގޮތުން ބްރެޒިލްގެ ފޯވާޑް ވިލިއަން އާއި ބްރެޒިލްގެ ޑިފެންޑަރު އެމާސަންގެ އިތުރުން އެމެރިކާގެ މިޑްފީލްޑަރު ކްރިސްޓިއަން ޕުލިސިޗް ވަނީ އަމިއްލަ ގައުމަށް ގޮސްފައެވެ.

ޗެލްސީގެ ބޭރު ކުޅުންތެރިން އެނބުރި އިންގްލެންޑަށް އައުމަށް އެންގީ ޕްރިމިއާ ލީގު އަލުން ފަށަން ތައްޔާރުވަމުން އަންނާތީ އެވެ. އެގޮތުން މެދުކަނޑާލާފައިވާ ޕްރިމިއާ ލީގުގެ މެޗުތައް ސަޕޯޓަރުން ނުވައްދާ ކުޅޭ ގޮތަށް ޖޫން މަހުގެ 8 ވަނަ ދުވަހު ފަށައި ޖުލައި މަހުގެ 27 ވަނަ ދުވަހަށް ލީގު އެއްކޮށް ފުރިހަމަކުރަން އަންނަނީ މަޝްވަރާ ކުރަމުންނެވެ.

އިންގްލެންޑަށް އަނބުރާ އަންނަ ކޮންމެ މީހަކު 14 ދުވަހު ކަރަންޓީނުގައި މަޑުކުރަން ޖެހޭއިރު، މި މުއްދަތުގައި އިންގްލެންޑަށް ނާދެވޭ ކުޅުންތެރިންނަށް ޗެލްސީން ލުއިދޭނެ ކަމަށް ރިޕޯޓުތައް ބުނެއެވެ.

ޕްރިމިއާ ލީގު އަލުން ފަށަން ތައްޔާރުވަމުން އަންނައިރު، މީގެ ކުރިން ޓޮޓެންހަމް ހޮޓްސްޕާ އާއި އާސެނަލާއި ބްރައިޓަން އަދި ވެސްޓް ހޭމް ޔުނައިޓެޑުން ވަނީ ކުޅުންތެރިން އެކަނި ތަމްރީނު ހެދުމުގެ ފުރުސަތު ހުޅުވާލާފައެވެ.

މާޗު މަހުގެ 13 ވަނަ ދުވަހު ޕްރިމިއާ ލީގު ކުޅުން ހުއްޓާލިއިރު، ލީގުގައި ވާދަކުރާ 20 ޓީމުގެ ތެރެއިން 16 ޓީމަކަށް ބާކީ އޮތީ 9 މެޗެވެ. ދެން އޮތް 4 ޓީމަށް 10 މެޗު އެބައޮތެވެ. ލީގު މެދުކަނޑާލިއިރު އެއްވަނައިގައި 82 ޕޮއިންޓާއެކު ލިވަޕޫލް އޮތީ 25 ޕޮއިންޓުގެ ލީޑަކާ އެކު އެވެ. ލީގު ކަށަވަރުކުރަން ލިވަޕޫލަށް ބޭނުންވަނީ އެންމެ 6 ޕޮއިންޓެވެ.