މާލެ ފުރަބަންދު (ލޮކްޑައުން) ކުރުމުގެ ސަބަބުން އެކި ސަބަބުތަކާހުރެ މާލެ ނާދެވިފައިތިބި ފަރާތްތަކުގެ މައުލޫމާތު ހިއްސާކުރުމަށް މާލޭ ސިޓީ ކައުންސިލުން އެދިއްޖެއެވެ.
ބުރާސްފަތި ދުވަހު މާލޭ ސިޓީ ކައުންސިލުން ނެރުނު އިއުލާނެއްގައި ބުނީ، މާލޭ ސިޓީގައި ދިރިއުޅޭ ފަރާތްތަކުގެ ތެރެއިން އެކި ބޭނުމަށް ރަށްރަށަށް ދަތުރުކޮށް މާލޭ ސީޓީގެ ލޮކްޑައުންއާ ގުޅިގެން އެނބުރި ނާދެވިފައި ތިބި ފަރާތްތަކުގެ މައުލޫމާތު ކައުންސިލުން ހޯދުމަށް ބޭނުންވާ ކަމަށެވެ. އަދި އެފަދަ ފަރާތްތަކުން 3 މެއި 2020 ވަނަ ދުވަހުގެ 14:00ގެ ކުރިން ކައުންސިލްގެ ނަންބަރު 9955788 އަށް މެސެޖުކޮށް އެ މައުލޫމާތުތައް ހިއްސާކުރުމަށް ވަނީ އެދިފައެއެވެ.
ފުރިހަމަ ނަމާއި، އައިޑީކާޑް ނަމްބަރާއި، ދާއިމީ އެޑްރެސްގެ އިތުރުން، އަތޮޅާއި ރަށް އަދި މިހާރު އުޅޭ އެޑްރެސްގެ މައުލޫމާތު ހިމަނަން ޖެހެއެވެ. އޭގެއިތުރުން، ގުޅޭނެ މޯބައިލް ނަމްބަރަކާއި އީމެއިލްގެ އިތުރުން މާލެއިން ފުރި ތާރީޚުވެސް ހިމަނަން ޖެހޭއިރު، ދަތުރުކުރަން ބޭނުންވާ ސަބަބުވެސް ބަޔާންކުރަން ޖެހޭނެކަމަށް އިއުލާނުގައި ބުނެފައިވެއެވެ.
މާލެ ސިޓީ ލޮކްޑައުން ކުރުމުގެ ސަބަބުން ގިނަ ބަޔަކު ރަށްރަށުގައި ތާށިވެފައި ތިބިއިރު، ރަށްރަށުން އެކި ސަބަބުތަކާހުރެ މާލެ އައިސް މާލޭގައި ތާށިވެފައި ތިބި އެތައް ބަޔަކުވެސް އެބަތިއްބެވެ. އަދި އެ ފަރާތްތަކުގެ މައުލޫމާތު ރަށްރަށުގެ ކައުންސިލުންވެސް ދަނީ ހޯދަމުންނެވެ.
