ކޮރޯނާވައިރަސް (ކޮވިޑް-19) އާ ގުޅިގެން ކެންސަލް ކުރަން ޖެހިފައިވާ ފްރެންޗު ލީގުގެ މަގާމުތައް ޕްލޭއޮފް ކުޅެގެން ކަނޑައަޅަން ލިޔޯންގެ ރައީސް ޖޯން-މިޗޭލް އޯލަސް ގޮވާލައްވައިފި އެވެ.

ފްރެންޗު ލީގު ކެންސަލް ކުރަން ޖެހުނީ ކޮވިޑް-19 ގެ ސަބަބުން ފްރާންސް ސަރުކާރުން ސެޕްޓެމްބަރު މަހުގެ ކުރިން ކުޅިވަރު ހަރަކާތެއް ނުބޭއްވޭ ގޮތަށް ކަނޑައެޅުމާ ގުޅިގެންނެވެ. އެއާ އެކު މި ފަހަރުގެ ލީގުގެ މަގާމުތަކާ މެދު ގޮތެއް ކަނޑައަޅަން ދި ފްރެންޗް ލީގު (އެލްއެފްޕީ) އިން އަންނަނީ ތައްޔާރުވަމުންނެވެ.

ޔުއެފާ އިން ލީގުތައް ކެންސަލް ކުރަން ހުއްދަ ދިނީ ޔޫރަޕްގެ މަގާމުތަކަށް ޓީމުތައް ކަނޑައެޅުމަށް ޝަރުތުކޮށްފައެވެ.

ރިޕޯޓުތައް ބުނާ ގޮތުން އެލްއެފްޕީގެ ވިސްނުން ހުރީ ލީގު ކެންސަލްކޮށް، އެއްވަނައިގައި އޮތް ޕީއެސްޖީ އަށް ޗެމްޕިއަންކަން ދިނުމަށެވެ. އެޓީމު އެއްވަނައިގައި އޮތީ 12 ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 68 ޕޮއިންޓު ލިބިފައިވާއިރު، ދެވަނައިގައި އޮތް މާސޭ އަށް ލިބިފައިވަނީ 56 ޕޮއިންޓެވެ.

ލިޔޯންގެ ރައީސް ޖޯން-މިޗޭލް އޯލަސް ދިދާޅުވީ ޔުއެފާ އިން އަންގަފައި އޮތީ އޯގަސްޓް ދެވަނަ ދުވަހުގެ ކުރިން ލީގުތައް ނިންމުމަށް ކަމަށާއި، އެހެންކަމުން ޕްލޭއޮފް މެޗުތަކެއް ކުޅުމަށްފަހު ލީގު ނިންމުމަކީ ހުރިހާ ޓީމަކަށްވެސް އެންމެ ހަމަހަމަވާނެ ގޮތް ކަމަށެވެ. އެހެންކަމުން ސަޕޯޓަރުން ނުވައްދައި ޕްލޭއޮފް މެޗުތަކެއް ކުޅުމަށްފަހު މަގާމުތައް ކަނޑައަޅަން އޭނާ ވަނީ ގޮވާލައްވާފައެވެ.

މިހާރު އޮތް ގޮތުންނަމަ އަންނަ އަހަރުގެ ޔުއެފާ ޗެމްޕިއަންސް ލީގަށް ކޮލިފައިވާނީ ޕީއެސްޖީ، މާސޭ އަދި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވާނީ ލިލް، ރެއިމްސް އަދި ނީސް އެވެ. އެގޮތަށް އެލްއެފްޕީ އިން ނިންމައިފިނަމަ، މިއީ 1997 ވަނަ އަހަރަށްފަހު ޔޫރަޕްގެ މުބާރާތަކުން ލިޔޯން އަށް ފުރުސަތު ނުލިބޭނެ ފުރަތަމަ ފަހަރެވެ.

ފްރެންޗު ލީގު ކެންސަލް ކުރަން ޖެހުނުއިރު، ޔުއެފާ އިން ވަނީ މި ފަހަރުގެ ސީޒަނާ މެދު ގައުމުތަކުން އަމަލުކުރާ ގޮތެއް ފައިނަލްކޮށް މެއި މަހުގެ 25 ގެ ކުރިން އެ ފެޑެރޭޝަނަށް އަންގަން ބުނެފައެވެ.