ކޮވިޑް-19 އާއި ގުޅިގެން ސަރުކާރުގެ އޮފީސްތައް މެއި މަހުގެ 14 އާއި ހަމަޔަށް ބަންދުކުރުމަށް ރައީސް އޮފީހުން ނިންމައިފިއެވެ.

ރައީސުލްޖުމްހޫރިއްޔާގެ އޮފީހުން މިއަދު ނެރުއްވި މި އަހަރުގެ 14 ވަނަ ނަންބަރު ދެންނެވުމުގައިވަނީ މާލޭގައި މަގުމައްޗަށް ނުކުމެއުޅުމާއި އެއްގަމު އުޅަނދުފަހަރު ދުއްވުން މަނާކޮށް ހެލްތު ޕްރޮޓެކްޝަން އޭޖެންސީ(އެޗްޕީއޭ) އިން ނެރެފައިވާ ޢަމުރު ތަންފީޒު ކުރުމުގެ ގޮތުން 2020 މެއި މަހުގެ 3 ވަނަ ދުވަހުން ފެށިގެން މެއި މަހުގެ 14 ވަނަ ދުވަހު ނިޔަލަށް ސަރުކާރުގެ އޮފީސްތައް ނުހުޅުވާ ގޮތަށް ރައީސުލްޖުމްހޫރިއްޔާ ހަމަޖައްސަވާފައިވާކަމަށެވެ.

ކޮވިޑް-19 އާ ގުޅިގެން، އަޅާ ފިޔަވަޅުތަކާއި އަސާސީ ޚިދުމަތްތައް ރައްޔިތުންނަށް ދިނުމުގައި ކުރިން އަންގާފައިވާ ގޮތަށް ޢަމަލުކުރުމަށް ރައީސް އޮފީހުން ވަނީ އިލްތިމާސްކޮށްފައެވެ. މިގޮތުން، އޮފީސްތައް ނުހުޅުވާ މުއްދަތުގެ ތެރޭގައި ޞިއްޙީ ޚިދުމަތްދޭ މަރުކަޒުތަކާއި ފާމަސީތަކުގެ ޚިދުމަތްތާއި، ފެނާއި ކަރަންޓާއި ނަރުދަމާގެ ޚިދުމަތާއި، ބްރޯޑްކާސްޓިންގގެ ޚިދުމަތާއި، ފޯނާއި އިންޓަރނެޓުގެ ޚިދުމަތާއި، ބޭންކުތަކުން ދޭ ޚިދުމަތާއި، ކައްކާ ގޭހާއި ފިޔުލްގެ ޚިދުމަތާއ، ވައިގެ ދަތުރުފަތުރުގެ ޚިދުމަތްތަކާއި، ވިޔަފާރި ބަނދަރުތަކުގެ ޚިދުމަތާއި، ކަސްޓަމާއި އިމިގްރޭޝަނާއި އޭވިއޭޝަން ކޮމާންޑުގެ ޚިދުމަތާއި، ސިފައިންނާއި ފުލުހުންގެ ޚިދުމަތާއި، ފަޔަރ އެންޑް ރެސްކިއުގެ ޚިދުމަތާއި، ޢަދުލު އިންސާފު ޤާއިމުކުރުމުގެ ބާރުގެ ޚިދުމަތާއި، ކޯޓުތަކުގެ ޚިދުމަތާއި، ޚާރިޖީ ގުޅުންތަކާބެހޭ ޚިދުމަތާއި، އިޖުތިމާޢީ ރައްކައުތެރިކަން ފޯރުކޮށްދިނުމުގެ ޚިދުމަތާއި، ދައުލަތުގެ ބެލުމުގެ ދަށުގައި ބައިތިއްބައިގެން މީހުންނާއި ކުދިން ބަލަހައްޓާ މަރުކަޒުތަކުން ދޭ ޚިދުމަތްތަކާއި، ޖަލުތަކުގެ ޚިދުމަތާއި، ރަށް ކުނިކަހައި ބެލެހެއްޓުމުގެ ޚިދުމަތާއި، ކުނިނަގާ އުކާލުމުގެ ޚިދުމަތާއި، މޫސުމާބެހޭ ޚިދުމަތް ދޭން ވާނެކަމަށެވެ.

މީގެއިތުރުން ބަލިޖެހޭ މީހުންނަށް ފަރުވާދިނުމާއި، ބަލިޖެހޭ މީހުންގެ ފަރާތުން އެހެން މީހުންނަށް ބަލިފެތުރުން ކުޑަކުރުމަށްޓަކައި ދައުލަތުގެ މުވައްޒަފުންގެ އެހީތެރިކަން ހޯދުމަށް ސަރުކާރުގެ އޮފީސްތަކަށް ރައީސުލްޖުމްހޫރިއްޔާ ވަނީ އަންގަވާފައެވެ. އަދި ކުރިއެކޭވެސް އެއްގޮތަށް މި ދުވަސްތަކުގެ ތެރޭގައިވެސް ގޭގައި ތިބެގެން ކުރެވެން ހުރި މަސައްކަތްތައް، ގޭގައި ތިބެގެން ކުރަމުން ގެންދިޔުމަށާއި، ސަރުކާރުގެ އިދާރާތަކުން އޮންލައިންކޮށް ދެވެން ހުރި ހުރިހާ ޚިދުމަތްތަކެއް އޮންލައިންކޮށް ދެމުން ގެންދިޔުމަށް އޮފީސްތަކަށް ވަނީ އަންގަވާފައިވެއެވެ.