ރާއްޖޭގައި މިވަގުތު ކޮވިޑް-19 އަށް ޕޮޒިޓިވްވެގެން ފަރުކޮޅުފުށީގައި ތިބި މީހުން ބަނޑޮސް އައިސޮލޭޝަން ފެސލިޓީ އަށް ބަދަލު ކުރަން ފަށާފައިވާކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

ކޮވިޑް-19 ގެ ޓާސްކް ފޯހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ ކޮވިޑް-19 އަށް ޕޮޒިޓިވްވެ ފަރުކޮޅުފުށީގައި ތިބި މީހުންގެ އިތުރުން ދެން މާލެ ސަރަހައްދުން ބައްޔަށް ޕޮޒިޓިވްވާ މީހުން ގެންދާނީ ބަނޑޮސް ފެސިލިޓީ އަށް ކަމަށެވެ. މަބްރޫކު ވިދާޅުވީ ފަރުކޮޅުފުށި ކަރަންޓީނު ފެސިލިޓީގައި ތިބި މީހުން ބަނޑޮހަށް ބަދަލު ކުރަނީ އެ ފެސިލިޓީގައި ދިމާވި ފެންލީކު ވުމާއި ކަރަންޓުގެ މައްސަލަތަކުގެ ސަބަބުން ކަމަށެވެ.

ހަތެއް ޕޮއިންޓް ތިނެއް މިލިއަން ރުފިޔާ ޚަރަދުކޮށްގެން ފަރުކޮޅު ފުށީގައި ގާއިމުކުރި ކަރަންޓީނު ފެސިލިޓީ މަރާމާތު ކުރުމަށްފަހު އަލުން ބޭނުންކުރަން ފަށާފައިވާއިރު އެ ފެސިލިޓީގައި ތިިބި ބަލި މީހުން އަންނަނީ އެތަނުގެ ހާލަތާ މެދު ކަންބޮޑުވުން ފާޅު ކުރަމުންނެވެ. އެހެންނަމަވެސް ފަރުކޮޅުފުށި ފެސިލިޓީ އަލުން މަރާމާތު ކުރުމަށް ފަހު ޕޮޒިޓިވްވާ މީހުން ބައިތިއްބުމަށް ބޭނުންކުރާނެ ކަމަށް މަބްރޫކު ވިދާޅުވި އެވެ.

މީގެއިތުރުން ށ. ނަރުދޫން ޕޮޒިޓިވްވި މީހުން ހއ ދޮނަކުޅި ރިސޯޓަށް ބަދަލު ކުރާނެކަމަށް މަބުރޫކް ވިދާޅުވި އެވެ. ސަރުކާރުން މިހާރު ވަނީ ރާއްޖޭގެ އުތުރާއި ދެކުނުގައި ކަރަންޓީނު އަދި އައިސޮލޭޝަން ފެސިލިޓީސްތައް ގާއިމުކޮށް އެތަންތަނުން ޚިދުމަތްދޭން ފަށާފަ އެވެ. ށ ނަރުދޫން 8 މީހަކު ޕޮޒިޓިވް ވެފައިވާއިރު އެމީހުން ކަރަންޓީނު ފެސިލިޓީއަށް ބަދަލުކުރިލެއް ލަސްކަމުން އާންމުން ވަނީ ކަންބޮޑުވުން ފާޅުކޮށްފަ އެވެ.

އެކަމާއި ގުޅިގެން މަބްރޫކް ވިދާޅުވީ ޓެގް ޓީމުން ފަހުން ލަފާ ލިބިފައިވަނީ ޕޮޒިޓިވްވާ މީހުން ރަށްރަށުގެ ކަރަންޓީނު ފެސިލިޓީއަށް ލުމުގެ ބަދަލުގައި އެސަރަހައްދެއްގެ ކަރަންޓީނު ފެސިލިޓީއަށް ގެންދިޔުމަށް ކަމަށްވާތީ ކަރަންޓީނު ފެސިލިޓީ ގާއިމު ކުރުމަށްފަހު ބަލި މީހުން ގެންދިޔުމަށް ކަމަށްވާތީ އެކަން ލަސްވެގެންދިޔައީ ކަަމަށެވެ.

މިހާތަނަށް އައިއިރު ރާއްޖެއިން 280 މީހަކަށް ކޮވިޑް-19 ޖެހިފައިވެ އެވެ.