ރަޝިޔާގައި ތިބި ދިވެހިންގެ ތެރެއިން 11 މީހަކު ރާއްޖެ ގެނެސްފައިވާ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
މަބްރޫކް ވިދާޅުވީ ރަޝިޔާގައި މިވަގުތު ރަޖިސްޓްރީ ކޮށްފައިވާ 84 މީހަކު އެބަތިބި ކަމަށެވެ. އަދި ހުރިހާ ދިވެހިންނަށް ފްލައިޓް އޮތްކަން އަންގާފައި ވާކަމަށާއި ރާއްޖެ އައިސްފައިވަނީ ރާއްޖެ އައުމަށް އެދުނު މީހުން ކަމަށް މަބްރޫކް ވިދާޅުވި އެވެ. އަދި އެމީހުން އައިސްފައިވަނީ އަމިއްލަ ޚަރަދުގައި ޓިކެޓް ނަގައިގެންކަމަށް މަބްރޫކް ވިދާޅުވި އެވެ.
މީގެއިތުރުން މަބްރޫކް ވަނީ ސައުދީ އަރަބިއްޔާގައި ކިޔަވަމުންދާ ދިވެހި ކުއްޖަކު ކޮންޓެކްޓްނުވެ ތިން ދުވަސްވަރު ވެފައިވާ ވާހަކައާ ގުޅިގެން ވަނީ އެކަން ސާފުކޮށްދެއްވާފަ އެވެ. އެގޮތުން އެކަން ފޮރިން މިނިސްޓްރީ މެދުވެރިކޮށް ސާފުކުރިއިރު އޭނާއާ ނުގުޅޭ ހާލަތެއް ނާންނަ ކަމަށާއި އާއިލާ އާއި މިނިސްޓްރީން އޭނާގެ ހާލަތު ބަލަމުންދާ ކަމަށާއި ބޭނުންވާ އެހީތެރިކަން ދެމުންދާކަމަށް މަބްރޫކް ވިދާޅުވި އެވެ.
ކޮވިޑް-19 ދުނިޔެއަށް ފެތުރެމުންދާއިރު ރާއްޖެ އަންނަން ބޭނުންވާ މީހުންނަށް ރާއްޖެ އައުމުގެ ފުރުސަތު ސަރުކާރުން އަންނަނީ ދެމުންނެވެ. އެގޮތުން މީގެކުރިން އިންޑިޔާ، ސްރީލަންކާ އަދި މެލޭޝިޔާ އާއި ބަންގްލަދޭޝް އިން އަންނަން ބޭނުންވި ފަރާތްތައް ވަނީ ރާއްޖެ ގެނެސްފަ އެވެ.
