އަމާޒު ބޯޓު ކޭސްގެ ކޮންޓެކްޓްތަކުގެ ތެރެއިން 36 މީހެއް ހައި ރިސްކް!

މި މަހުގެ 15 ވަނަ ދުވަހު މާލެއިން ފުރައިގެން އުތުރުގެ އަތޮޅުތަކަށް ދަތުރު ކުރި ''އަމާޒް'' ބޯޓުގެ ކެޕްޓަން ކޮވިޑް-19 އަށް ޕޮޒިޓިވްވުމާއި ގުޅިގެން މިހާތަނަށް ހައި ރިސްކް 36 މީހެއް ފާހަގަވެފައިވާކަމަށް ކޮވިޑް-19 ޓާސްކްފޯހުން ބުނެފިއެވެ.

ބުދަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓެކްނިކަލް އެޑްވައިސަރީ ގްރޫޕް (ޓެގް) ޓީމް ގެ ޑޮކްޓަރު އިބްރާހިމް އަފްޒަލް ވިދާޅުވީ، އަމާޒް ބޯޓުގެ ކެޕްޓަން ޕޮޒިޓިވްވި ކޭސްއާ ގުޅިގެން މިހާތަނަށް 118 ކޮންޓެކްޓެއް ފާހަގަވެފައިވާއިރު، އޭގެ ތެރެއިން 36 މީހުންނަކީ ހައި ރިސްކް ކޮންޓެކްޓްތަކުގެ ގޮތުގައި ފާހަގަވެފައިވާ ކަމަށެވެ. އެޗްޕީއޭއިން ދަނީ މިހާރު އެ މީހުންގެ ސާމްޕަލް ނަގައި ޓެސްޓު ކުރުމުގެ މަސައްކަތް ކުރަމުންނެވެ.

އޭގެ އިތުރުން، 13 މީހެއްގެ ކިބައިން ބަލީގެ އަލާމަތްތައް ފެންނަމުންދާކަންވެސް ޑޮކްޓަރ ފާހަގަކުރެއްވިއެވެ.

ޑޮކްޓަރ ވިދާޅުވީ، މި ކޭސްއާ ގުޅިގެން ނެގިފައިވާ ސާމްޕަލްތަކުގެ ތެރެއިން ނަތީޖާ ލިބިފައިވާ 2 ފަރާތެއް ނެގެޓިވްވެފައިވާ ކަމަށާއި، މި ކްލަސްޓަރއަށް ރ އަތޮޅު އިނގުރައިދޫވެސް އިތުރުވެފައިވާ ކަމަށެވެ.