ށ ޅައިމަގު އަދި ހދ ކުޅުދުއްފުށީގެ މޮނިޓަރިންގ އުވާލައިފި
ދެ ރަށްވެސް މިހާރު އާންމު ޙާލަތަށް ގެނެވިފައިވާކަން މަބްރޫކު ފާހަގަކުރެއްވި
ށ ޅައިމަގު
ކޮވިޑް-19 އާ ގުޅިގެން މޮނިޓަރިންގެ ޙާލަތަށް ގެނެސްފައިވާ 2 ރަށެއް ކަމަށްވާ ށ ޅައިމަގާއި، ހދ ކުޅުދުއްފުށީގެ މޮނިޓަރިންގެ ޙާލަތު އުވާލާފައިވާކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) އިން ބުނެފިއެވެ.
ބުދަ ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ކޮވިޑް-19 އާ ގުޅިގެން އެ ދެ ރަށް މޮނިޓަރިންގެ ޙާލަތަށް ގެނެވިފައިވީނަމަވެސް މިހާރު އެ ދެ ދަށުގެ މޮނިޓަރިންގްވެސް އުވާލާފައިވާ ކަމަށެވެ. އަދި ދެ ރަށްވެސް މިހާރު އާންމު ޙާލަތަށް ގެނެވިފައިވާކަން މަބްރޫކު ފާހަގަކުރެއްވިއެވެ.
ކޮވިޑް-19 އާ ގުޅިގެން ރަށްރަށް މޮނިޓަރިންގެ ޙާލަތަށް ގެންދިއުމާއި، މޮނިޓަރިންގ އުވާލުމުގެ ބާރު ލިބިގެންވަނީ ޑިރެކްޓަރ ޖެނެރަލް އޮފް ޕަބްލިކް ހެލްތަށެވެ. އެގޮތުން ކޮވިޑް-19 އިން ރައްކާތެރިވުމުގެ ގޮތުން އާންމު ސިއްޙަތު ރައްކާތެރި ކުރުމުގެ ޤާނޫނުގެ ދަށުން ބެލުމަށް ކަނޑައެޅިފައިވާ ކަންކަން ބަލައިނިމި، މޮނިޓަރިންގ ގެ ޙާލަތު އިތުރަށް ދަމަހައްޓަންޖެހޭ ސަބަބެއް ނެތްކަން ޑީޖީއަށް ފާހަގަކުރެވުމުން ބައެއް ރަށްރަށުގެ މޮނިޓަރިންގ އުވާލަމުންދެއެވެ.
މިހާރުވެސް މާލެ ސަރަޙައްދުގެ އިތުރުން ރާއްޖޭގެ ގިނަ ބައެއް ރަށްރަށް އަދިވެސް މޮނިޓަރިންގެ ޙާލަތަށް ގެނެވިފައިވެއެވެ.
