ދަރުމަވަންތަ ހޮސްޕިޓަލުގައި އޮތް 80 އަހަރުގެ މީހާގެ ޙާލު ގޯސްވެ އޮކްސިޖަން ގުޅައިފި
ހަކުރު ބަލި އަދި ކޮލެސްޓްރޯލްއަށް 80 އަހަރުގެ މީހާ ދިޔައީ ފަރުވާ ހޯދަމުން
ދަރުމަވަންތަ ހޮސްޕިޓަލް
މިހިނގާ އޭޕްރީލް މަހުގެ 21 ވަނަ ދުވަހު މާލެ ސަރަޙައްދުން ކޮވިޑް-19 އަށް ޕޮޒިޓިވްވި 80 އަހަރުގެ މީހާގެ ޙާލު ގޯސްވެ، އޮކްސިޖަން ގުޅާފައިވާކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) އިން ބުނެފިއެވެ.
ބުދަ ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިސަރީ ގްރޫޕް (ޓެގް) ގައި ހިމެނިވަޑައިގަންނަވާ ޑޮކްޓަރ އިބްރާހިމް އަފްޒަލް ވިދާޅުވީ، ދަރުމަވަންތަ ހޮސްޕިޓަލުގެ ޑީއެޗް 11 ގައި އެޑްމިޓްކޮށްފައިވާ 80 އަހަރުގެ މީހާގެ ޙާލު ގޯސްވެ، އޮކްސިޖަން ގުޅާފައިވާ ކަމަށެވެ.
ދަރުމަވަންތަ ހޮސްޕިޓަލުގެ ޑީއެޗް11 ގައި ފަރުވާ ހޯދަމުންދާ 80 އަހަރުގެ މީހާއަކީ ސްޓްރޯކެއް ޖެހުމުގެ ސަބަބުން 2 އަހަރު ވަންދެން އެދުމަތިވެފައިވާ މީހެއް ކަމަށާއި، އޭނާއަކީ ހަކުރު ބައްޔާއި، ކްލޮސްޓްރޯލް އަދި ލޭމައްޗަށް ދިއުންފަދަ ބަލިތަކަށް ފަރުވާ ހޯދަމުން އަންނަ މީހަކަށް ވުމުގެ އިތުރުން، މީގެ ކުރިން ނިއުމޯނިއާވެސް ޖެހިފައިވާ މީހެއް ކަމަށް ޓެގް ޓީމުން މީގެ ކުރިން ހާމަކޮށްފައިވެއެވެ.
ހަމައެއާއެކު އޭނާއަކީ ކޮވިޑް-19 ޖެހިގެން ޙާލު ނުރައްކާ ވުމުގެ ފުރުސަތު އޮތް މީހެއްކަން ޑޮކްޓަރުން މީގެ ކުރިންވެސް ފާހަގަކޮށްފައިވެއެވެ.
80 އަހަރުގެ މީހާ އަށް މިވަގުތު ދަނީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާ ދެމުންނެވެ. 11 ވަނަ ފަންގިފިލާއަކީ ކޮވިޑް-19 އާއި ގުޅިގެން ހާލުބޮޑުވާ ބަލި މީހުންނަށް ފަރުވާ ދިނުމަށް ހާއްސަކޮށްފައިވާ ތަނެކެވެ. އެގޮތުން އުމުރުން ދުވަސްވީ މީހުންނާއި، އިތުރު ފަރުވާދޭން ޖެހޭ މީހުންގެ އިތުރުން ޑޮކްޓަރުން ގާތުން ބަލަން ބޭނުންވާ ބައެއް މީހުން މީގެ ކުރިންވެސް އައިސޮލޭޝަން ފެސިލިޓީތަކުން ދަރުމަވަންތަ ހޮސްޕިޓަލަށް ބަދަލުކުރެވިފައިވެއެވެ.
