ކޮންޓެކްޓް ޓްރޭސިންގ ތެރެއިން ފާހަގަ ކުރެވުނު އުމުރުން ދުވަސްވީ މީހަކު ނިޔާވެއްޖެ

ކޮމިއުނިޓީ ސްޕްރެޑާއި ގުޅިގެން ކޮންޓެކްތް ޓްރޭސިންގެ ތެރެއިން ފާހަގަކުރިގެން ސާމްޕަލް ނެގި މީހަކު ނިޔާވެފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފިއެވެ.

ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ މި މީހާ ނިޔާވެފައިވަނީ ބުދަ ދުވަހުގެ ވަގުތެއްގައި ކަމަށެވެ. އަދި 83 އަހަރުގެ މި މީހާއަކީ ދިގުމުއްދަތަށް ބޭސް ބޭނުންކުރަމުން ދިޔަ މީހެއް ކަމަށާއި، އޭނާ ފާހަގަ ކުރެވިފައިވަނީ ކޮންޓެކްޓް ޓްރޭސިންގެ ތެރެއިން ކޮންޓެކްޓެއްގެ ގޮތުގައި ކަމަށެވެ.

އެމީހާގެ ސާމްޕަލް ނެގިފައިވާ ކަމަށާއި، މިކަމާއި ގުޅިގެން މިއީ ކޮވިޑް ކޭސްއަކަށް ވެދާނެތޯ ނުވަތަ ނޫންތޯ ބެލުމަށް ސާމްޕަލްގެ ނަތީޖާ ކަންތައްތަކާއި އަދި އިތުރު ތަފްސީލުތައް މާދަމާ ޓެގް ޓީމުން ހާމަކުރައްވާނެ ކަމަށް މަބްރޫކް ވިދާޅުވިއެވެ. މި މީހާގެ ސާމްޕަލްގެ ނަތީޖާ އަދި ނުލިބޭ ކަމަށް މަބްރޫކް ވިދާޅުވިއެވެ.

މީގެ އިތުރުން ގދ. ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލުގައި ބުދަ ދުވަހު 78 އަހަރުގެ މީހެއް ނިޔާވެފައިވާ ކަމަށާއި، މިއީ ސާރީ ނުވަތަ ސިވިއަރ އެކިއުޓް ރެސްޕިރޭޓަރީ އިލްނެސްގެ ކޭސްއެއް ކަމަށް މަބްރޫކް ވިދާޅުވިއެވެ. އަދި މި މީހާގެ ފުއްޕާމޭގެ މައްސަލައެއް ހުރި ކަމަށާއި، އޭނާ ވެންޓިލޭޓަރަށް ވެސް ލެވުނު ކަމަށް މަބްރޫކް ވިދާޅުވިއެވެ. މީގެ އިތުރުން އަންގާރަ ދުވަހު ތިނަދޫގައި މަރުވި މީހާއާއި ބުދަ ދުވަހު މަރުވި މީހާއާއި 2 މީހުންނާއި ދޭތެރޭގައި ވެސް ކަންތައް ކުރެވިފައިވާ ގޮތަކީ 27 ވަނަ ދުވަހު ސާމްޕަލް ނެގުމަށް އެންގި ސާމްޕަލް ނަގަފައިވާ ކަމަށެވެ.

އަދި އެޗްޕީއޭގެ ފަރާތުން އަންގާފައިވާނީ މި 2 ކޭސްގައި ވެސް ހިނެވުމުގެ ކަންތައް ކުރިއަށް ގެންދިއުމަށާއި، އެކަން ކުރަން އިނގޭ ޖަމާއަތްތެރިންގެ ޓީމެއް އެ ރަށުގައި ތިބުމުން، އެ ބޭފުޅުންނަށް ޕީޕީއީ ފޯރުކޮށްދީފައިވާނެ ކަމަށެވެ. މި 2 ކޭސްގެ ސާމްޕަލްގެ ނަތީޖާ ވެސް އަދި ނުލިބެއެވެ.