ކޮވިޑް-19 ރޯގާއާއި ގުޅިގެން ވަކި މުއްދަތެއް ނެތްގޮތަށް ފަސްކުރެވުފައިވާ ލޯކަލް ކައުންސިލްތަކުގެ އިންތިޚާބާގުޅޭ ޚާއްޞަ ބިލު (ސަންސެޓް ބިލް) ރައްޔިތުންގެ މަޖިލީހުން ފާސްކުރުމާގުޅިގެން، މިހާރު ސަސްޕެންޑް ކުރެވިފައިވާ ސިވިލް ސަރވިސް މުވައްޒަފުންގެ ސަސްޕެންޝަން މައްސަލައަށް ހައްލެއް ލިބިގެން ހިނގައްޖެއެވެ.

ރައްޔިތުންގެ މަޖިލީހުން ބުދަ ދުވަހު ބޭއްވި ޖަލްސާގައި އެބިލު ފާސްކޮށްފައިވަނީ، އެބިލް ދިރާސާކުރި މަޖިލީހުގެ މިނިވަން މުއައްސަސާތަކުގެ ކޮމެޓީން ނިންމިގޮތުގެ ރިޕޯޓަށް ހުށަހެޅުނު އިޞްލާޙުތަކާއެކުގަ އެވެ.

އެގޮތުން ކޮމެޓީ ރިޕޯޓަށް ހުށަހެޅުނު އެއް އިޞްލާޙަކީ ސިވިލް ސަރވިސް މުވައްޒަފުންގެ ސަސްޕެންޝަން މައްސައާ ގުޅިގެން ތުޅާދޫ ދާއިރާގެ މެންބަރު ހިސާން ހުސައިން ހުށަހެޅުއްވި އިޞްލާޙެކެވެ.

ހިސާން ހުށަހެޅުއްވި އިޞްލާޙުގައި ވިދާޅުވީ، ލޯކަލް ކައުންސިލްތަކުގެ އިންތިޚާބާގުޅޭ ޚާއްޞަ ޤާނޫނަށް ޢަމަލު ކުރަން ފެށުމާއެކު، ލޯކަލް ކައުންސިލްތަކުގެ އިންތިޚާބު 2020ގައި، ވާދަކުރާނެ ކެންޑިޑޭޓުންކަމުގައި 6 މާރޗު 2020ގައި، އިލެކްޝަންސް ކޮމިޝަނުން އިޢުލާނުކޮށްފައިވާ، ކެންޑިޑޭޓުންގެ ތެރޭގައި ހިމެނޭ، ސިވިލް ސަރވިސްގެ މުވައްޒަފުން، ޤާނޫނު ނަންބަރު 10/2010 (ލޯކަލް ކައުންސިލްތަކުގެ އިންތިޚާބުގެ ޤާނޫނު) 13 ވަނަ މާއްދާގެ ދަށުން، އެތާރީޚުން (6 މާރޗު 2020) ފެށިގެން ސިވިލް ސަރވިސްގެ ވަޒީފާއިން ސަސްޕެންޑްކޮށްފައި އޮތްއޮތުން ބާޠިލުވީއެވެ.

ސަރުކާރުން ރައްޔިތުންގެ މަޖިލީހަށް ފޮނުވި، ބިލުގައި ވެސް ބުނެފައިވަނީ ހިސާން ހުށަހެޅުއްވި ގޮތަށެވެ. ނަމަވެސް އެބިލަށް ކޮމެޓީން ވަނީ އިޞްލާޙު ގެނެސްފައެވެ.

ކޮމެޓީން ގެނެސްފައިވާ އިސްލާހުގައި ބުނަނީ، ސަސްޕެންޑް ކުރެވިފައިވާ ސިވިލް ސަރވިސްގެ މުވައްޒަފުންގެ ސަސްޕެންޝަން 4 އޭޕްރީލްއިން ފެށިގެން ބާތިލްވާ ގޮތަށެވެ. ސަބަބެއް ކަމަށް ކޮމެޓީ ރިޕޯޓްގައި ބުނެފައި ވަނީ، އެއީ އިންތިހާބު ބާއްވަން ފުރަތަމަ އިއުލާން ކުރެވުނު ތާރީހް ކަމަށްވާތީ ކަމަށާއި އެއީ މިވަގުތަށް އެންމެ އަދުލްވެރި ގޮތްކަމަށް ކޮމެޓީގެ މެމްބަރުންނަށް ފެނިވަޑައިގަންނަވާތީ ކަމަށެވެ.

ކޮމެޓީގެ ރިޕޯޓަށް ހިސާން އެ އިޞްލާޙު ހުށަހެޅުއްވީ، އެރިޕޯޓުގައި އޮތްގޮތުން ކުރިން ހިނގާފައިވާކަމަކަށް، ފަހުން އަންނަ ޤާނޫނަކުން (ރެޓްރޮސްޕެކްޓިވް) އަމަލު ކުރެވޭގޮތަށް ކަންކަން ކުރުމަކީ ޤަބޫލު ކުރައްވާ ކަމެއް ނޫންކަމަށް ވިދާޅުވެއެވެ. އަދި އެއީ މަޖިލީހުން ޢަމަލު ކުރަން އެހާ ރަނގަޅު ގޮތެއް ވެސް ނޫންކަމަށެވެ.

މީގެއިތުރުން، ހޯރަފުށި ދާއިރާގެ މެންބަރު އަހުމަދު ސަލީމު ވެސް އިޞްލާޙެއް ހުށަހެޅުއްވި އެވެ. ސަލީމު ހުށަހެޅުއްވި އިޞްލާޙުގައި މައިގަނޑު ގޮތެއްގައި ވިދާޅުވެފައިވަނީ، ސަސްޕެންޑް ކުރެވިފައިވާ ސިވިލް ސަރވިސް މުވައްޒަފުންގެ ބަދަލުގައި އިންތިޚާބުގައި ވާދަކުރާ ކެންޑިޑޭޓަކަށް ވުމާއި ގުޅިގެން ސަސްޕެންޑް ކުރެވިފައިވާ ހުރިހާ ކެންޑިޑޭޓުންގެ ސަސްޕެންޝަން ބާޠިލުވާ ގޮތަށެވެ. މާނައަކީ ސަސްޕެންޑް ކުރެވިފައިވާ ސިވިލް ސަރވިސް ކެންޑިޑޭޓުން ނޫން ކެންޑިޑޭޓަކު ސަސްޕެންޝަނުގައި ހުރިނަމަ، އެޙައްޤު އެ ކެންޑިޑޭޓަކަށްވެސް ލިބޭގޮތަށެވެ.

ސަލީމް އެގޮތަށް ހުށަހެޅުއްވި ނަމަވެސް، ލޯކަލް ކައުންސިލްތަކުގެ އިންތިޚާބުގެ ޤާނޫނުގައި ބުނަނީ ހަމައެކަނި ސިވިލް ސަރވިސް މުވައްޒަފުންގެ ވާހަކައެވެ. އަދި ސަލީމް ހުށަހެޅުއްވި އިޞްލާޙަށް ވޯޓަށް އައްސަވާފައިނުވަނީ އޭގެކުރިން، ހިސާން ހުށަހެޅުއްވި އިޞްލާޙު މަޖިލީހުން ފާސްވުމާއި ގުޅިގެންނެވެ.

މިބިލަށް ޢަމަލު ކަރަށް ފަށާނީ ރައީސުލްޖުމްހޫރިއްޔާ މިބިލު ތަޞްދީޤުކުރައްވާ ދުވަހު ފެށިގެންނެވެ.