ދަނޑުވެރިކަމުގެ ބާވަތްތައް ސަރުކާރުގެ ކުންފުނިން މިހާރު ގަންނާނެ
29 އެޕްރީލު 2020 | ބުދަ 05:45ކުންފުނީގެ ސޭލްސް ޓީމުގެ ނަންބަރު 3320829
ރަށެއްގެ ދަނޑު ހައްދާ ބިމެއް
މި ރަމަޟާން މަހު ދަނޑުވެރިކަން ކުރާ ފަރާތްތަކުން އުފައްދާފައިވާ ތަރުކާރީ އާއި މޭވާގެ ބާވަތްތައް ރަށު ކައުންސިލްތަކާއި ގުޅިގެން ގަތުމުގެ އިންތިޒާމް ހަމަޖެހިފައިވާ ކަމަށް ދަނޑުވެރިކަމަށް ހާއްސަކޮށްގެން އުފައްދާފައިވާ އެގްރޯ ނެޝަނަލް ކޯޕަރޭޝަން ލިމިޓެޑު(އެގްރޯނެޓް) އިން ބުނެފިއެވެ.
އެގްރޯނެޓްގެ މައިގަނޑު މަގްސަދަކީ ސަރުކާރުގެ ސްޓްރެޓެޖިކް އެކްޝަން ޕްލޭންގެ ތެރެއިން، ނޫ އިގްތިސާދުގެ އަމާޒުތަކާއި އެއްގޮތްވާ ގޮތުގެ މަތިން ރާއްޖޭގެ ދަނޑުވެރިކަމުގެ ސިނާއަތް ކުރިއަރުވާ އާލާކުރުމެވެ.
އެ ކުންފުނީގެ މަސައްކަތް ފަށާފައިވާއިރު، އެގްރޯނެޓުން ކޮށްފައިވާ ޓްވީޓެއްގައި ބުނީ، ރަމަޟާން މަހު ދަނޑުވެރިކަން ކުރާ ފަރާތްތަކުން އުފައްދާފައިވާ ތަރުކާރީ އާއި މޭވާގެ ބާވަތްތައް ރަށު ކައުންސިލްތަކާއި ގުޅިގެން ގަތުމަށް ހަމަޖެހިފައިވާ ކަމަށެވެ.
ތަކެތި ވިއްކަން ޝައުގުވެރިވާ ދަނޑުވެރިން ފޯމް ފުރުމުން ރަޖިސްޓްރީ ވެވޭނެ ކަމަށް އެގްރޯ ކުންފުނިން ބުންޏެވެ. އަދި އިތުރު މައުލޫމާތު ބޭނުންވާ ފަރާތްތަކުން ކުންފުނީގެ ސޭލްސް ޓީމުގެ ނަންބަރު 3320829 ގުޅުމަށް ވަނީ އިލްތިމާސްކޮށްފައެވެ.
ކޮވިޑް-19 ގެ ސަބަބުން ރާއްޖޭގެ ގިނަ ރަށްރަށުގެ ދަނޑުވެރިން ހައްދާފައިވާ މޭވާއާއި ތަރުކާރީ ނުވިކި ހަލާކުވާތީ ދަނޑުވެރިން ވަނީ ކަންބޮޑުވުން ފާޅުކޮށްފައެވެ. ބިން އޮތް ރަށްރަށުން އެ ރަށުގެ ކައުންސިލްތަކާއި ގުޅިގެން ތިން އަހަރު ދުވަހުގެ މުއްދަތަށް ކުއްޔަކާއި ނުލާ ދަނޑުވެރިކަން ކުރަން ބިން ދޫކުރުމަށް ނިންމާފައިވާ ކަމަށް ފިޝަރީޒް މިނިސްޓްރީން ވަނީ ހާމަކޮށްފައެވެ.
