ތިނަދޫގައި މަރުވި މީހާ ވަޅުލީ ކޮވިޑް-19 އަށް ސާމްޕަލް ނެގުމަށްފަހު އޮންނަ އުސޫލުގެ މަތިން: މަބްރޫކް

ގދ. ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލްގައި މަރުވި އުމުރުން ދުވަސްވީ މީހާ ވަޅުލީ ކޮވިޑް-19 އަށް ޓެސްޓް ކުރުމަށް ސާމްޕަލް ނެގުމަށްފަހު އޮންނަ އުޞޫލުގެ މަތިން ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

މަބްރޫކް ވިދާޅުވީ ވާނުވާ ނޭނގި މީހަކު މަރުވެއްޖެނަމަ ކޮވިޑް-19 އާއި ގުޅޭ ޢަލާމާތެއް ހުރިތޯ ބެލުމަށް ޓެސްޓް ކުރެވެނޭ ކަމަށެވެ. އަދި މިހާތަނަށް ޢަމަލު ކުރަމުން އައީ އެގޮތަށް ކަމަށާއި، މިހާތަނަށް އެވެސް ކޭސްއެއް ކޮވިޑް-19 އާއި ގުޅުނުކަމެއް އެނގިފައެއް ނެތްކަމަށެވެ.

އަދި އަބްދުއްސަމަދު މެމޯރިއަލް ހޮސްޕިޓަލުގައި ފަރުވާ ދެމުން ދަނިކޮށް މަރުވި މީހާ ކޮވިޑް-19 އަށް ލަފާ ކުރެވުނު ނަމަ ހޮސްޕިޓަލުން ޓެސްޓް ކުރާނެ ކަމަށާއި، އެމީހާއަކީ ސާރީ ނުވަތަ ސިވިއަރ އެކިއުޓް ރެސްޕިރޭޓަރީ އިލްނެސްގެ ކޭސްއެއްގެ ގޮތަށް ހޮސްޕިޓަލުގައި ފަރުވާދެވުނު މީހެއް ކަމަށާއި، އޭނާގެ ސާމްޕަލް ނެގުނު ކަމަށެވެ.

މަބްރޫކް ވިދާޅުވީ މޫނު ދެއްކުމުގެ ކަންކަން ކުރިއަށް ގެންގޮސްފައިވަނީ ކަށުކަމާކެމީގެ ކަންކަން ނިންމުމަށްފަހުގައި ކަމަށާއި، އެމީހާގެ ޢާއިލާއިން ގދ. މަޑަވެއްޔަށް ގެންދިއުމަށް އެދިވަޑައިގެންނެވި ނަމަވެސް ޕްރިކޯޝަންސްގެ ގޮތުން އެގޮތަށް ރަށަށް އަނބުރާ ގެންދިއުމުގެ ކަންތައްތައް ނުކުރަން ނިންމާ ތިނަދޫގައި ވަޅުލުމުގެ ކަންކަން ކުރުމަށް ނިންމާފައިވާކަމަށެވެ.

އަދި ޓެގް ޓީމުން ވިދާޅުވެފައިވަނީ ނިޔާވާ މީހެއްގެ 3 ފޫޓް ދުރުން މޫނުބެލުމުގެ ކަންތައް ކުރިއަށް ގެންދިއުމަކީ ރައްކާތެރިގޮތްކަމަށާއި، އަދި އެކަން އެގޮތަށް ކުރެވޭނެ ކަމަށެވެ. އަދި މަރުވި މީހާގެ ކޭސްގައި ވެސް ކަންތައް ކޮށްފައި ހުންނާނި އެގޮތަށް ކަމަށް މަބްރޫކް ވިދާޅުވިއެވެ.

ގދ. މަޑަވެއްޔަށް ނިޞްބަތްވާ 87 އަހަރުގެ މީހާގެ ކަށުކަމާކެމީގެ ކަންކަން ގެންދިޔަގޮތާމެދު ޢާއިލާއިން ހިތްހަމަ ނުޖެހުން ފާޅުކޮށްފައިވެއެވެ. އަދި ވަޅުލާފައިވަނީ ނުހިނަވާ ތަޔަމްމަމް ކޮށްގެން ކަމަށް ޢާއިލާއިން ބުނެފައިވެއެވެ. ނަމަވެސް އެ ވާހަކަތައް އަބްދުއްސަމަދު މެމޯރިއަލް ހޮސްޕިޓަލުން ވަނީ ދޮގުކޮށްފައެވެ.