ބިދޭސީން ގިނައިން އުޅޭ ތަންތަނަށް އަމާޒްކޮށްގެން ޓެސްޓްކުރުމުގެ މަސައްކަތް ކުރިޔަށް އެބަދޭ: މަބްރޫކް
ބަލީގެ އަލާމާތްތައް ފެންނަ ފަރާތްތައް އިތުރަށް ޓެސްޓްކުރޭ
އެންއީއޯސީން ބޭއްވި ނޫސްވެރިންގެ ބައްދަލުވުމުގައި މަބްރޫކް ވާހަކަ ދައްކަވަނީ
ބިދޭސީން ތޮއްޖެހިގެން އުޅޭ ތަންތަން ހާއްސަ ސަމާލުކަމެއް ދީގެން މޮނިޓަރ ކުރަމުންދާކަމަށާއި އެފަދަ ފަރާތްތައް ދެނެގަނެ ޓެސްޓްކުރަމުންދާކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރުގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.
އަންގާރަ ދުވަހުގެރޭ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓާސްކް ފޯހުގެ ތަރުޖަމާން މަބްރޫކް ވިދާޅުވީ، ގިނަ އަދަދަކަށް ތޮއްޖެހިގެން ބިދޭސީން ދިރިއުޅޭ ތަންތަން މޮނިޓަރކޮށް މިހާރު ކުރިއަށް ގެންދާ ސަރވެއިލަންސްގެ ތެރެއިން ޓެސްޓުކުރަމުންދާކަމަށެވެ. އަދި އެތަންތަނުން ބަލީގެ އަލާމާތްތައް ފެންނަ ފަރާތްތައް އިތުރަށް ޓެސްޓުކުރަމުންދާކަމަށްވެސް އޭނާ ވިދާޅުވި އެވެ.
މަބްރޫކް ވިދާޅުވީ، މިހާތަނަށް ކޮވިޑް-19 އަށް ޕޮޒިޓިވްވި ގިނަ އަދަދެއްގެ ބިދޭސީންނަކީ އެޗްޕީއޭގެ ފަރާތުން ބަލަމުން އައި ތަންތަނުން ފެނިފައިވާ މީހުންކަމަށެވެ. އަދި އަންގާރަ ދުވަހު ކުރެވުނު ޓެސްޓްތަކުގެ ތެރޭގައިވެސް ގިނަ މީހުން އެއްތަނެއްގައި ދިރިއުޅެމުންދާ ކުއާޓަރތަކުން ނެގިފައިވާ ސާމްޕަލްތައް ހިމެނޭކަމަށް މަބްރޫކް ވިދާޅުވި އެވެ.
މިކަމާއި ގުޅޭ އިތުރު ތަފްސީލް ހިއްސާކުރައްވަމުން، އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ އެކްޓިވް ސަރވެއިލަންސްގެ ބޭނުމަކީ، މީހުން ތޮއްޖެހިގެން ދިރިއުޅޭ ތަންތަން ދެނެގަނެ އެތަނަކަށް ސަމާލުކަމެއް ދިނުންކަމުގައެވެ.
މާލެ ސިޓީގައި ކޮވިޑް-19 ފެތުރިފައި އޮތް މިންވަރު ދެނެގަތުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ފަށާފައިވާ ކޮމިއުނިޓީ ސްޕްރެޑް ސަރވޭގެ ތެރެއިން އާދިއްތަ ދުވަހު އެކަނިވެސް ވަނީ މާލޭގެ އެކި ސަރަހައްދުން 25 ސާމްޕަލް ނަގައިފައެވެ.
