ށ ނަރުދޫގައި ކޮމިއުނިޓީ ސްޕްރެޑެއް އެބައޮތް
އަމާޒް ބޯޓުގެ ކެޕްޓަން ޕޮޒިޓިވްވުމާ ގުޅިގެން ގިނަ ފަރާތްތަކެއް ވަނީ އެކަހެރި ކުރެވިފައި
ނަރުދޫ \"އަމާޒް ބޯޓު\"ގެ ކެޕްޓަން ޕޮޒިޓިވްވުމާ ގުޅިގެން ގިނަ ބަޔަކު ވަނީ އެކަހެރި ކުރެވިފައި
ށ. އަތޮޅު ނަރުދޫގައި ކޮމިއުނިޓީ ސްޕްރެޑެއް އެބައޮތް ކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)އިން ބުނެފިއެވެ.
އަންގާރަ ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓެކްނިކަލް އެޑްވައިސަރީ ގްރޫޕް (ޓެގް)ގައި ހިމެނިވަޑައިގަންނަވާ ޑޮކްޓަރ އިބްރާހިމް އަފްޒަލް ވިދާޅުވީ، ނަރުދޫ "އަމާޒް ބޯޓު"ގެ ކެޕްޓަން ޕޮޒިޓިވްވުމާ ގުޅިގެން ހެދުނު ކޮންޓެކްޓް ޓްރޭސިންގ ގެ ދަށުން މިހާތަނަށް ގިނަ ބަޔަކު ފާހަގަވެފައިވާ ކަމަށެވެ.
އެގޮތުން އެ ކޭސްއާ ގުޅިގެން މިހާތަނަށް 113 ކޮންޓެކްޓެއް ފާހަގަވެފައިވާއިރު، އޭގެ ތެރެއިން 9 މީހަކު ޕޮޒިޓިވްވެފައިވާކަމަށް ޑޮކްޓަރު ވިދާޅުވިއެވެ. އަދި އޭގެތެރެއިން 8 މީހުންނަކީ ނަރުދޫއަށް ނިސްބަތްވާ މީހުންނަށްވާއިރު، ނަރުދޫގައި މިހާރު ކޮމިއުނިޓީ ސްޕްރެޑެއް އުޅެދާނެކަމަށް ބެލެވޭކަންވެސް ފާހަގަ ކުރައްވާފައިވެއެވެ.
މި ކޭސްއާ ގުޅިގެން މިހާރުވެސް އިތުރު ގިނަ ރަށްތަކެއް މޮނިޓަރިންގެ ޙާލަތަށް ގެނެވިފައިވާއިރު، އޭގެ ތެރޭގައި ށ އަތޮޅުގެ ރަށްތަކާއި، ނ އަތޮޅުގެ އިތުރުން ހއ އާއި ބ އަތޮޅުގެ ރަށްތަކެއްވެސް ހިމެނެއެވެ.
އެންއީއޯސީން ވަނީ އަމާޒު ބޯޓުން ދަތުރުކުރި މީހުންނާއި އެމީހުންގެ ކޮންޓެކްޓްވެފައިވާ ފަރާތްތައް ހޯދުމުގެ މަސައްކަތް ފަށާފައެވެ. އެގޮތުން އެރަށްރަށުގައި އުޅޭ ފަރާތްތައް ބަލީގެ އަލާމާތެއް ފެނިއްޖެނަމަ ލަސްނުކޮށް އެޗްޕީއޭއަށް ރިޕޯޓް ކުރުމަށްވެސް އެދިފައިވެއެވެ.
މާލެއިން ބޭރު ރަށަކުން ކޮވިޑް-19 ގެ ޕޮޒިޓިވް ކޭސްއެއް ފެނުނު 2 ވަނަ ރަށަކީ ނަރުދޫއެވެ. އެގޮތުން މާލެއިން ބޭރު ރަށަކުން އެންމެ ފުރަތަމަ ކޮވިޑް-19 ގެ ކޭސްއެއް ފެނިފައިވަނީ ހއ އުލިގަމުންނެވެ.
