ސުނިލް ޗެތުރީ ކުޅުން ހުއްޓާލަނީ!

ބައިޗުން ބުޓިއާއަށްފަހު އިންޑިއާގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާގެ ގޮތުގައި ގިނަ ބަޔަކު ޤަބޫލުކުރާ ސުނިލް ޗެތްރީ ޤައުމީ ޓީމަށް ކުޅުން ހުއްޓާލަން ނިންމާފައިވާކަމުގެ އިޝާރާތެއް ދީފިއެވެ.

ޗެތްރީ ބުނި ގޮތުގައި 2019 ވަނަ އަހަރު އެކުވެރި އަރަބި އިމާރާތުގައި އޮންނަ އޭޝިއަން ކަޕް ވަނީ އޭނާ އިންޑިއާގެ ގައުމީ ޓީމަށް ކުޅޭނެ އެންމެ ފަހު ބޮޑު މުބާރާތަށެވެ.

އިންޑިއާގެ ގައުމީ ފުޓްބޯޅަ ޓީމުގެ ކެޕްޓަން ޗެތްރީ ވަނީ އެޓީމުން ހޯދި ގިނަ ކާމިޔާބީ ތަކެއްގައި އިސްރޯލެއް އަދާކޮށްފައެވެ.

އެގޮތުން ސަރަހައްދީ ފެންވަރުގެ މުބާރާތްތަކާއި އެނޫންވެސް ވެސް މުބާރާތްތަކުގައި އޭނާ ވަނީ އިންޑިއާއަސް ބޮޑެތި ކާމިޔާބީ ތަކެއް ހޯދައިދީފައެވެ.

އެގޮތުން ދެހާސް އަށް ވަނަ އަހަރު، އިންޑިއާގައި ބޭއްވި އޭއެފްސީ ޗެލެންޖް ކަޕްގެ ފައިނަލް މެޗު ފާހަގަކޮށްލެވެއެވެ.

އެމެޗު 4-1 އިން ތަޖަކިސްތާން ބަލިކޮށް، ގަތަރުގައި 2011 ވަނަ އަހަރު ބޭއްވި އޭޝިއަން ކަޕަށް އިންޑިއާ ގެންގޮސް ދިނުމުގައި ޗެތުރީގެ ހިއްސާ ވަރަށް ބޮޑެވެ.

ފައިނަލް މެޗުގައި އިންޑިއާ އިން ޖެހި 4 ލަނޑުގެ ތެރެއިން 3 ލަނޑަކީ ޗެތުރީ ކާމިޔާބުކޮށްދިން ލަނޑުތަކެވެ.

މީގެ އިތުރުން ކުރިއަށް އޮތް 2019 ވަނަ އަހަރުގެ އޭޝިއަން ކަޕަށް ކޮލިފައިވުމަށް އިންޑިއާ އާ މިޔަންމާ ކުޅުނު މެޗުގައި ވެސް ޗެތުރީ ވަނީ ލަނޑެއް ޖަހާފައެވެ.

މިޔަންމާގެ މައްޗަށް އިންޑިއާ އިން ކުރިހޯދި މިލަނޑަކީ އިންޑިއާއަށް ޗެތުރީ ކުޅެދިން 93 މެޗުގައި، ކާމިޔާބު ކުރި 53 ވަނަ ގޯލެވެ.