ޑޮކްޓަރުންނާއި ނަރުހުން ކަރަންޓީން ކުރާ އުސޫލު ތަފާތުވާނެ: މަބްރޫކް
28 އެޕްރީލު 2020 | އަންގާރަ 09:05ސިއްހީ ޚިދުމަތްތެރިން ފުރިހަމައަށް ރައްކާތެރިކަމުގެ ފިޔަވަޅު އަޅާނެ
އައިޖީއެމްއެޗްގައި މަސައްކަތް ކުރާ ނަރުހުންތަކެއް
ޢާންމު ރައްޔިތުން ކަރަންޓީން ކުރާ އުޞޫލާއި، ކޮވިޑް-19ގެ މަސައްކަތުގައި ޙަރަކާތްތެރިވާ ޑޮކްޓަރުންނާއި، ނަރުހުން ކަރަންޓީން ކުރާ އުޞޫލު ތަފާތުވާނެކަމަށް ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
ކޮވިޑް-19ގެ އެންމެފަހުގެ މަޢުލޫމާތު ހިއްސާކުރުމަށް ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކަރަންޓީން ފެސިލިޓީތަކުގައި މަސައްކަތް ކުރާ ޞިއްޙީ ޚިދުމަތްތެރިންނާއި، ހޮސްޕިޓަލުތަކުގައި މަސައްކަތް ކުރާ ޞިއްޙީ ޚިދުމަތްތެރިންނަކީ ވަރަށް ރަނގަޅަށް ތަމްރީނުވެފައި ތިބި ބޭފުޅުން ކަމަށެވެ.
ކޮވިޑް-19ގެ މަސައްކަތުގައި އެންމެ ބުރަބޮޑުކޮށް މަސައްކަތް ކުރާ ބޭފުޅުންނަކީ ޞިއްޙީ ޚިދުމަތްތެރިން ކަމަށާއި، ޑޮކްޓަރުންނާއި، ނަރުހުންގެ އިތުރުންވެސް ޞިއްޙީ ޚިދުމަތަތެރިން މަސައްކަތް ކުރަނީ ރައްކާތެރިކަމުގެ ފުރިހަމަ ފިޔަވަޅު އަޅާގެން ކަމަށް މަބްރޫކް ވިދާޅުވިއެވެ.
ޑޮކްޓަރުން އެއްރަށުން އަނެއް ރަށަށް ދަތުރުކުރައްވާކަން ފާހަގަކުރައްވައި މަބްރޫކް ވިދާޅުވީ މިއީ ނުރައްކަލެއް އޮތްކަމެއް ނޫން ކަމަށާއި، އެބޭފުޅުން ދަތުރު ކުރައްވާނީ ރައްކާތެރިކަމުގެ ގޮތުން އަޅަންޖެހޭ ހުރިހާ ފިޔަވަޅެއް އަޅުއްވައިގެން ކަމަށެވެ.
މަބްރޫކް ވިދާޅުވީ އެބޭފުޅުންގެ އެއްވެސް ރޯގާގެ ޢަލާމާތެއް ފެނިއްޖެ ކަމުގައިވާނަމަ، އަދި މަސައްކަތް ކުރަން ޖެހޭ އުޞޫލުން ކިރިޔާ ވެސް ކައްސާލާފައިވާކަން ފާހަގަކުރެއްވިއްޖެއްޔާ އެބޭފުޅުން އައިސޮލޭޓް ކޮށް ޓެސްޓު ކުރާކަމަށެވެ.
މީގެ އިތުރުން މަބްރޫކް ވިދާޅުވީ ޢާންމު އުޞޫލުން ޞިއްޙީ ޚިދުމަތްތެރިން ކަރަންޓީނުކޮށް، އައިސޮލޭޓް ކުރަންޖެހޭނަމަ ރާއްޖޭގައި ޚިދުމަތްދޭނެ ޑޮކްޓަރުންނާއި، ނަރުހުން ނުތިބޭނެ ކަމަށެވެ.
މަބްރޫކް ވިދާޅުވީ ޑޮކްޓަރުންނާއި ނަރުހުން ޢާންމުންނާ ތަފާތުވާނެ ކަމަށެވެ. އަދި ޞިއްޙީ ޚިދުމަތްތެރިން ޢަމަލުކުރާ ގޮތާއި، ރައްކާތެރިވުމުގެ ގޮތުން އަޅާ ފިޔަވަޅުތައް ވެސް ތަފާތުކަން މަބްރޫކް ފާހަގަކުރެއްވިއެވެ.
