ކޮވިޑް-19ގެ މިހާލަތުގައި 450 މީހަކު ވަޒީފާއިން ވަކިކޮށްގެން ޖޮބް ސެންޓަރަށް ރިޕޯޓުކޮށްފައިވާ ކަމަށް ސަރުކާރުން ހާމަކޮށްފިއެވެ.

ކޮވިޑް-19 އާ ގުޅިގެން ރާއްޖޭ ފަތުރުވެރިކަމުގެ ދާއިރާ އެއްކޮށް މިވަނީ ހުއްޓިފައެވެ. އެގޮތުން ގިނަ ބައެއްގެ ވަޒީފާ ގެއްލި، ނުވަތަ ނޯޕޭލީވް، ނުވަތަ މުސާރަ ކުޑަކުރަމުންދާ ކަމުގެ ޝަކުވާތައް އަންނަމުންދާތީ، ސަރުކާރުން ވަނީ އެއްވެސް މީހަކު ވަޒީފާއިން ކަނޑައި، މުސާރަ ކުޑަ ކުރުންފަދަ ކަންކަން ނުކުރުމަށް ވަޒީފާ ދޭ ފަރާތްތަކަށް އިލްތިމާސްކޮށްފައެވެ.

ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވީ މިދަނޑިވަޅުގައި މުއައްޒަފުންނަށް ނިކަމެތިކަން ލިބޭ ގޮތަށް ކަންކަން ކުރުމަކީ ސަރުކާރުން ބަލައި ގަންނާނެކަމެއް ނޫންކަމަށެވެ.

މަބްރޫކް ވިދާޅުވީ، މިހާތަނަށް 1832 ފަރާތަކުން ޖޮބް ސެންޓަރަށް މައްސަލަ ރިޕޯޓުކޮށްފައިވާއިރު، ވަޒީފާ އިން ވަކިކޮށްގެން 450 މީހަކު ރިޕޯޓުކޮށްފައިވާކަމަށެވެ.

މަބްރޫކް ވިދާޅުވީ، މީގެތެރޭގައި މުސާރަ ނުލިބޭގޮތައް ޗުއްޓީގަ ތިބިކަމަށް ބުނާ 562 މީހަކާއި، މުސާރަ ކުޑަކުރިކަމަށް 253 މީހުން، ބައި މުސާރައަށް މުސާރައަށް ކުޑަކުރިކަމަށް ބުނާ 160 މީހުން، ވަޒީފާއިން ސަސްޕެންޑު ކުރެވުނުކަމަށް ބުނާ 131 މީހުން އަދި ބޭސިކް މުސާރަ އެކަނި ލިބޭގޮތަށް ހަދާފައިވާކަމަށް ބުނެ .63 މީހަކު ޖޮބް ސެންޓަރަށް ރިޕޯޓްކޮށްފައިވާކަމަށެވެ.

މީގެއިތުރުން އަމިއްލަ މަސައްކަތް ކުރާ 193 މީހަކު ވެސް ޖޮބް ސެންޓަރަށް މައްސަލަ ހުށަހަޅާފައިވާކަމަށް މަބްރޫކް ވިދާޅުވިއެވެ.

އިކޮނޮމިކް މިނިސްޓްރީން ވަނީ ކޮވިޑް-19 ގެ ސަބަބުން ވަޒީފާއިން ވަކިކުރެވިފައިވާނަމަ، ނުވަތަ މުސާރައާއި އެލަވަންސްތަކަށް އެއްވެސް ބަދަލެއް ގެނެވިފައިވާނަމަ، ނުވަތަ ވަޒީފާގެ ހާލަތަށް އެފަދަ އެހެން ބަދަލެއް އައިސްފައިވާނަމަ، މިނިސްޓްރީން ގާއިމުކޮށްފައިވާ ޖޮބް ސެންޓަރުގައި ރިޕޯޓުކުރުމަށް އެދިފައެވެ.

ރާއްޖޭގައި ރިސޯޓުތަކުގައި ވަޒީފާ އަދާކުރާ 11،000 އަށްވުރެ ގިނަ މުވައްޒަފުންނަށް ވަޒީފާއިން ކެނޑުމާއި، މުސާރަ ކުޑަކުރުމާއި މުސާރަ ނުހިނގާގޮތަށް ޗުއްޓީ ނެގުމަށް މަޖުބޫރު ކުރަމުންދާ މައްސަލަތައް ވަނީ ފެންމަތިވެފައެވެ.