ކޮވިޑް-19 ޖެހިފައިވާ މީހަކު ށ. ނަރުދޫއިން ފެނުމާއި ގުޅިގެން އެ ރަށުން 22 ސާމްޕަލް ނަގާފައިވާކަމަށް އެ ރަށު ކޮވިޑް-19 ޓާސްކް ފޯހުން ބުނެފިއެވެ.

ނަރުދޫއިން ކޮވިޑް-19 އަށް ޕޮޒިޓިވްވެފައިވަނީ އެ ރަށު ''އަމާޒު'' ބޯޓުގެ ކެޕްޓަން އެވެ. ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ، އާބަދީގައި 600 މީހުން ދިރިއުޅޭ ނަރުދޫ މޮނިޓަރިންގެ ހާލަތަށް ގެންގޮސްފައެވެ.

އެ ރަށު ޓާސްކްފޯހުގެ ޗެެއަރމަން މުސްތަފާ މޫސާ ރާއްޖެ.އެމްވީއާ ވާހަކަދައްކަމުން ވިދާޅުވީ، އެ ރަށުން ކޮވިޑް-19 ގެ ކޭސްއެއް ފެނިފައިވިޔަސް ރަށުގެ އާއްމު ހާލަތު ޖުމްލަ ގޮތެއްގައި ރަނގަޅު ކަމަށާއި، ނަމަވެސް ރައްޔިތުންގެ ތެރޭގައި ކޮންމެވެސް ވަރަކަށް ހާސްކާން އެބައޮތް ކަމަށެވެ. ޓާސްކް ފޯހުން ބުނީ، އެ ރަށުގެ އަށްގެއަކަށް ވަދެ ނިކުތުން މަނާކޮށްފައިވާ ކަމަށެވެ.

މުސްތަފާ ވިދާޅުވީ، އެ ރަށުން ޕޮޒިޓިވްވި މީހާގެ ޑައިރެކްޓް ކޮންޓެކްޓުންގެ ތެރެއިން 22 މީހެއްގެ ސާމްޕަލް ނަގައި މާލެއަށް ފޮނުވާފައިވާ ކަމަށެވެ.

އެ ރަށު ރައްޔިތުން ތިބި ސާމްޕަލްގެ ނަތީޖާ އަށް އިންތިޒާރުކޮށްގެންނެވެ.

އޭނާ ވިދާޅުވީ، ހުރިހާ ފަރާތްތަކުން މި ވަގުތު ތިބީ ގޭގައި ކަމަށާއި، އެއްވެސް އެހީއެއް ބޭނުންވާނަމަ ކައުންސިލުން އެ އެހީތެރިކަން ފޯރުކޮށްދެމުން ދާނެ ކަަމަށެވެ.

ޓާސްކު ފޯސްގެ ޗެއަރމަން ވިދާޅުވީ، ސިއްހީ މަރުކަޒުގައި އެކަށީގެންވާ ވަރަށް މާސްކުތައް އެބަހުރި ކަމަށާއި، އޭގެ އިތުރުން ރައްޔިތުންނަށް ބޭނުންވާ ވަރަށް އެ ތަކެތި ފިހާރާގައިވެސް އެބަހުރި ކަަމަށެވެ.