އަތޮޅުތެރޭގައި އުޅޭ ބިދޭސީންގެ ލިސްޓު ނެގުމަށާއި، ރޯގާގެ އަލާމަތްތައް ހުރިތޯ ބަލަން އަންގައިފި
ރާއްޖެއިން މިހާތަނަށް ކޮވިޑް-19 އަށް 137 ބިދޭސީން ވަނީ ޕޮޒިޓިވްވެފައި
ކޮވިޑް-19 އަށް ރޭންޑަމް ސާމްޕަލް ނެގުމަށް ޓާސްކްފޯހުން ކުރިއަށްގެންދިޔަ ސަރވައިލަންސްގެ ތެރެއިން
އަތޮޅުތެރޭގައި އުޅޭ ބިދޭސީންގެ ލިސްޓު ނެގުމަށާއި، ރޯގާގެ އަލާމަތްތައް ހުރިތޯ ބަލަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގައިފިއެވެ.
އަތޮޅުތެރެއިން ކޯވިޑް-19ގެ ބަލިމީހުން ދެނެގަތުމާއި ބަލިއުޅޭތޯ ބެލުމުގެ ނިޒާމް ޤާއިމުކުރުމުގައި ޢަމަލުކުރާނެ ގޮތުގެ އުސޫލުގައި އެޗްޕީއޭ އިން ބުނީ ރަށް ރަށުގައި ދިރިއުޅޭ ބިދޭސީންގެ ލިސްޓެއް ނެގުމުގެ އިތުރުން ބިދޭސީން ތެރޭގައި ރޯގާގެ އަލާމާތްތައް ހުންނަ ފަރާތްތައް ދެނެގަތުމަށް އެމީހުން އުޅޭ ހިސާބަށް ދިއުމަށް އެދޭ ކަމަށެވެ. ރޯގާގެ އަލާމާތްތައް ހުރި ބިދޭސީން ރަށުތެރެއިން ގިނަ އަދަދަކަށް ފެނިއްޖެނަމަ، އެޗްޕީއޭ އަށް ވީއެންމެ އަވަހަކަށް ރިޕޯރޓް ކުރުމަށް ހުރިހާ ސިއްހީ މަރުކަޒުތަކަށާއި، ރީޖަނަލް އަދި ހޮސްޕިޓަލުތަކަށް އަންގާފައިވެއެވެ.
މީގެ އިތުރުން ރޯގާގެ އެއްވެސް އަލާމާތެއް ފެނިއްޖެނަމަ ރަށުގައި އުޅޭ ބިދޭސީން ޞިއްޙީ ޚިދުމަތްދޭ ތަނަކަށް އަމިއްލައަށް ރިޕޯރޓް ކުރެވޭނެ އިންތިޒާމް ހަމަޖައްސާފައި ހުންނަވާނެ ކަމަށް ވެސް އުސޫލުގައިވެއެވެ.
މި އުސޫލުގައި އާންމުން ހޭލުންތެރި ކުރުވުމަށް ވެސް އަންގާފައިވެއެވެ. އެގޮތުން އާންމުން ހޭލުންތެރިކުރުވުމާއި ކޮވިޑުގެ މައުލޫމާތު އާންމުންނަށް ފޯރުކޮށްދޭން ޖެހޭނެ ކަމަށް އެޗްޕީއޭ އިން ބުނެއެވެ. އަދި ކޯވިޑް-19ގެ ނުރައްކަލަށް އިތުރަށް ހުށަހެޅިދާނެ ފަރާތްތަކާއި (މިސާލު: މާބަނޑު މީހުން، ކުޑަކުދިން، އުމުރުން ދުވަސްވީ މީހުން، ހާއްސަ އެހީއަށް ބޭނުންވާ ފަރާތްތައް) އަދި ދާއިމީ ބަލިހުންނަ ފަރާތްތައް (މިސާލު: ހަކުރުބަލި، ހިތުގެ ބަލި، ކިޑްނީގެ ބަލި، ފުއްޕާމޭގެ ބަލި، ކެންސަރު ފަދަ) ހޭލުންތެރިކުރުވުން މުހިންމު ކަމަށެވެ.
