އަތޮޅު ތެރެއިން ކޮވިޑް-19 ގެ ބަލި މީހުން ދެނެގަތުމާއި، އަމަލުކުރާނެ ގޮތުގެ އުސޫލު އާންމުކޮށްފި
އަރިދަފުސް ރޯގާގެ ޢަލާމާތްތައް ހުންނަ ފަރާތެއް ފެނިއްޖެނަމަ އަމަލުކުރާނެ ގޮތްތަކެއް ކަނޑައަޅާފައިވޭ
ކޮވިޑް-19 ޓާސްކް ފޯހުގެ ފްރަންޓްލައިންގައި މަސައްކަތް ކުރާ ފަރާތްތައް ރޭންޑަމް ޓެސްޓް ހެދުމަށް ކުރި މަސައްކަތުގެ ތެރެއިން
އަތޮޅުތެރެއިން ކޮވިޑް-19 ބަލިމީހުން ދެނެގަތުމާއި ބަލިއުޅޭތޯ ބެލުމުގެ ނިޒާމް ޤާއިމުކުރުމުގައި ޢަމަލުކުރާނެގޮތުގެ އުސޫލު އާންމުކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ ކޮވިޑް-19 ގެ ސަރވެއިލަންސް ހެދުމާއި ޓެސްޓް ކުރުމުގެ އިންތިޒާމް އަތޮޅުތެރޭގައި އިތުރަށް ފުޅާކޮށް އަމަލުކުރާނެ އުސޫލުގެ ދަށުން ހުރިހާ ރީޖަނަލް ހޮސްޕިޓަލާއި އަތޮޅު ހޮސްޕިޓަލް އަދި ޞިއްޙީ މަރުކަޒުތަކުން އަރިދަފުސް ރޯގާގެ ޢަލާމާތްތައް ހުންނަ ފަރާތެއް ފެނިއްޖެނަމަ އަމަލުކުރާނެ ގޮތްތަކެއް ކަނޑައަޅާފައެވެ.
ޓްރެވެލް ހިސްޓްރީ ހުރި ފަރާތްތަކާ މެދު ޢަމަލު ކުރާނެގޮތްތަކަކީ މާލެ އޭރިޔާއިން އަތޮޅުތެރެއަށް ގޮސްފައިވާ ފަރާތެއް، ރިސޯރޓްތަކުން އަތޮޅުތެރެއަށް ގޮސްފައިވާ ފަރާތެއް އަދި ކޮވިޑް-19 އަށް ޕޮޒިޓިވްވެފައިވާ މީހުން އުޅޭ އެއްވެސް ރަށަކުން ގޮސްފައިވާ ފަރާތެއްނަމަ، އެރަށަކަށް ދިޔަތާ 14 ދުވަހުގެ ތެރޭގައި އަރިދަފުސް ރޯގާގެ ޢަލާމާތްތައް ފެނިއްޖެނަމަ ފުލޫ ކުލިނިކަކަށް ދައްކާ އޮންނަ އުސޫލުގެ މަތިން އަމަލުކުރުމެވެ. އަދި ޓެސްޓްގެ ނަތީޖާ ލިބެންދެން މިފަރާތުގެ ޑައިރެކްޓް ކޮންޓެކްޓްތައް (ހައިރިސްކް އަދި މޮޑަރެޓް ރިސްކް) ގޭގައި ކަރަންޓީން ކުރަންވާނެ ކަމަށް ބުނެފައިވެއެވެ.
މީގެއިތުރުން ވޭތުވެދިޔަ 14 ދުވަސް ތެރޭގައި ރާއްޖެއިން ބޭރަށް ދަތުރުކޮށްފައިވާ ނުވަތަ ކޮވިޑް-19 އަށް ޕޮޒިޓިވް މީހަކު ފެނިފައިވާ ރަށަކުން ދަތުރުކޮށްފައިވާ ނުވަތަ ޕޮޒިޓިވްވި މީހެއްގެ ޑައިރެކްޓް ކޮންޓެކްޓެއްކަމުގައިވާ ކޮވިޑް-19 ގެ ޢަލާމާތެއް ނެތް މީހަކު ގޭގައި ނުވަތަ ފެސިލިޓިގައި 14 ދުވަހަށް ނުވަތަ ހާލަތަށް ބަލާ އެޗްޕީއޭ އިން ކަނޑައަޅާ މުއްދަތަކަށް އެކަހެރިކޮށް ބަހައްޓަން ޖެހެއެވެ.
މި އުސޫލުގެ ދަށުން ގޭގައި އެކަހެރި ކުރުން ނުވަތަ ހޯމް އައިސޮލޭޝަން ކުރާނެ ގޮތްތަކަކީ ކޮވިޑް-19 ގެ އަލާމާތްތައް ހުންނަ ހުރިހާ ފަރާތެއްވެސް އެޑްމިޓް ކުރަން ޖެހޭހާ ބަލި ނޫންނަމަ ގޭގައި ނުވަތަ އެކަމަށް ރަށުގައި ކަނޑައަޅާފައިވާ ތަނެއްގައި އެކަހެރި ކުރުމެވެ. އަދި ޕޮޒިޓިވް މީހަކު ފެނިއްޖެ ނަމަ އެއްވެސް ފަރާތެއް ކޮވިޑް-19 އަށް ޕޮޒިޓިވް ވެއްޖެނަމަ އައިސޮލޭޝަން ފެސިލިޓީއަކަށް ގެންދެވެންދެން ރަށުގައި ކަނޑައެޅިފައިވާ ތަނެއްގައި އައިސޮލޭޓް ކޮށްފައި ބަހައްޓަންވާނެ ކަމަށް ބުނެފައެވެ.
ޕޮޒިޓިވްވި ފަރާތް ދިރިއުޅޭގެ ކޮންޓެކްޓް ޓްރޭސިންގ ހަދާ ނިމެންދެން މޮނިޓަރިންގައި ބެހެއްޓުމުގެ އިތުރުން މޮނިޓަރިންގ ކަނޑައަޅާ ލިޔުން ދޫކުރާނީ އެންއީއޯސީގެ ލީގަލް ކްލަސްޓަރއިންނެވެ. އަދި މިފަރާތުގެ ޑައިރެކްޓް ކޮންޓެކްޓްތައް (ހައިރިސްކް އަދި މޮޑަރެޓް ރިސްކް) ކަރަންޓީން ފެސިލިޓީއަކަށް ގެންދެވެންދެން ގޭގައި ނުވަތަ އެކަމަށް ރަށުގައި ކަނޑައަޅާފައިވާ ތަނެއްގައި ކަރަންޓީން ކުރަންވާނެ ކަމަށް ބުނެފައިވެއެވެ.
