ކާޑުގެ ދަތިކަމެއް ނާންނާނެ، ފާއިތުވި ހަފްތާގެ ތެރޭގައި 40،000 ބަސްތާގެ ކާޑު އަތޮޅުތެރެއަށް ފޮނުވިން: އަމްރު
27 އެޕްރީލު 2020 | ހޯމަ 23:16މިހާތަނަށް 58 ރަށެއްގެ ކައުންސިލާއި ގުޅާފައިވޭ
ކާޑުގެ ބާވަތްތައް އުފުލުމުގައި ބިދޭސީން ހަރަކާތްތެރިވަނީ
ކާޑުގެ ދަތިކަމެއް އޮތްނަމަ އެކަން ހައްލުކޮށް ދެއްވާނެކަމަށާއި ފާއިތުވި ހަފްތާ 40،000 ބަސްތާގެ ކާޑު އަތޮޅުތެރެއަށް ފޮނުވާފައިވާކަމަށް އެސްޓީއޯގެ މެނޭޖިންގް ޑިރެކްޓަރ ހުސައިން އަމްރު ވިދާޅުވެއްޖެއެވެ.
މިކަން ހާމަކޮށް އަމުރު ކުރަށްވާފައިވާ ޓުވީޓެއްގައި ވިދާޅުވީ މި އަހަރުގެ ރޯދަމަސް ދިމާވެފައިވަނީ ހާއްސަ ހާލަތެއްގައި ކަމަށާއި އެކަމާއި ގުޅިގެން ކާޑުގެ ޑިމާންޑް އިތުރުވެފައިވާ ކަމަށެވެ. ނަމަވެެސް، މި ހައްސާސީ ދަނޑިވަޅުގައި ކާޑުގެ ދަތިކަމެއް ނެތްކަމަށް އަމްރު ވަނީ ވިދާޅުވެފައެވެ. އަދި މާލެ ސަރަހައްދުގެ ފިހާރަތަކަށް ވެސް ކާޑު ގުދަނުން ކާޑު ގެންދެވޭނެކަމަށް އޭނާ ވިދާޅުވިއެވެ.
އަމްރު އިތުރަށް ވިދާޅުވީ، ފާއިތުވި 7 ދުވަސް ތެރޭ ރަށްރަށަށް ކާޑު ގެންދާ އޮޑިފަހަރުތަކަށް 40،000 ބަސްތާގެ ކާޑު އަރުވާފައިވާ ކަމަށާއި ރަށްރަށުގައި ކާޑު ހުރި ވަރު ބެލުމަށް ކައުންސިލްތަކާއި ގާތުން މަސައްކަތްކުރައްވަމުން ގެންދަވާކަމަށެވެ. އޭނާ ވިދާލުވީ ކައުންސިލާއި ގުޅައިގެން އެ ރަށްތަކުގެ ހާލަތު ވަރަށް ގާތުން ބަލަމުން އަންނަކަމަށާއި އެގޮތުން މިހާތަނަށް 58 ރަށެއްގެ ކައުންސިލާއި ގުޅާފައިވާކަމަށެވެ. ހުރިހާ ރަށަކަށް ގުޅާ ކާޑުގެ ދަތިކަމެއް އޮތްނަމަ އެކަން ހައްލުކޮށް ދެއްވާނެކަމަށް އަމްރު ވަނީ ވިދާޅުވެފައެވެ.
އަމްރު ވަނީ ކޮވިޑް-19 އާއި ގުޅިގެން ބަލި ފެތުރިޔަނުދީ ކޮންޓްރޯލް ކުރުމަށް އަޅާފައިިވާ ފިޔަވަޅުތަކާއެކުވެސް، ރޯދަ މަހުގައި ކާޑުގެ ބާވަތްތަކަށް އަންނަ ޑިމާންޑް އާއި އެއްވަރަށް އެތަކެތި ފޯރުކޮށްދިނުމަށް މުވައްޒަފުން ކުރާ މަސައްކަތް ފާހަގަކުރައްވާފައެވެ.
