ފްރަންޓް ލައިންގައި މަސައްކަތް ކުރާ ފަރާތްތައް ބޭނުންކުރާ އިތުރު ތަކެތީގެ ޑިއުޓީ މައާފްކޮށްފި

ޞިއްޙީ ދާއިރާގެ ބޭނުމަށް އެތެރެކުރެވޭ އިތުރު ބާވަތްތަކެއްގެ ޑިއުޓީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަޢާފު ކޮށްދެއްވައިފިއެވެ.

ކަސްޓަމްސްއިން ނެރުނު ބަޔާނެއްގައި ބުނެފައިވަނީ ޢާއްމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން ރާއްޖޭގައި ޞިއްޙީ ކުއްލި ނުރައްކަލުގެ ޙާލަތު އިޢުލާން ކޮށްފައިވާ މުއްދަތުގެ ތެރޭގައި ދިވެހިރާއްޖެއަށް އެތެރެކުރުމަށް އެދޭ މުދަލުގެ ތެރެއިން، ޞިއްޙީ ދާއިރާގެ ބޭނުމަށް އިމްޕޯޓުކުރެވޭ ގޮގުލްސް، ޕްރޮޓެކްޓިވް ފައުންސް އަދި ކަވަރއޯލް، ހަޒްމަޓް ސޫޓްސް، ސަރޖަންސް ކެޕްސް އަދި ޝޫ ކަވަރު ފަދަ ރައްކާތެރިކަމުގެ ފިޔަވަޅުތަކަށް ބޭނުންވާ ތަކެތީގެ އިމްޕޯޓު ޑިއުޓީ އާއި ޕްރޮސެސިންގ ފީ މައާފް ކޮށްދީފައިވާ ކަމަށެވެ.

މި ތަކެތީގެ ޑިއުޓީ މައާފްކޮށްދީފައިވަނީ މި މަހުގެ 26 ވަނަ ދުވަހުން ފެށިގެންނެވެ.

ޞިއްޙީ ކުއްލި ނުރައްކަލުގެ ޙާލަތު އިޢުލާންކޮށްފައިވާ މުއްދަތުގެ ތެރޭގައި ދިވެހިރާއްޖެއަށް އެތެރެ ކުރުމަށް އެދޭ މުދަލުގެ ތެރެއިން، ރައްކާތެރި ކަމުގެ ގޮތުން ބޭނުން ކުރެވޭ އަންގިއާއި މާސްކާއި ފޭސް ޝީލްޑް، އަދި ސައިބޯންޏާއި ސެނިޓައިޒަރ ފަދަ ގިނަ ބާވަތްތަކެއްގެ މުދަލުގެ ޑިއުޓީ ވަނީ މީގެ ކުރިން ރައީސުލްޖުމްހޫރިއްޔާ މަޢާފުކޮށްދެއްވާފައެވެ.