ސަރުކާރުގެ ވަޒީރުންގެ ތެރެއިން ވަޒީރަކު ސެކަންޑްރީ ކޮންޓެކްޓަކަށްވުމާއި ގުޅިގެން ހުންނެވީ އައިސޮލޭޓް ވެވަޑައިގެން ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.
ހޯމަ ދުވަހުގެ ރޭ އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ތިން ވަޒީރަކާއި ގުޅޭ ކޭސްތަކެއް ފާހަގަކުރެވިފައިވާކަމަށެވެ.
އެގޮތުން މަބްރޫކް ވިދާޅުވީ ކޮވިޑް-19 ގެ އަލާމާތްތައް ހުރި މީހަކާއި ބައްދަލުވި މީހަކާއި ވަޒީރާއި ބައްދަލުވެފައިވާކަމަށެވެ. އެ ވަޒީރު ސެކަންޑްރީ ކޮންޓެކްޓެއްގެ ގޮތުގައި ފާހަގަކުރެވުމާއި އެކު ހުންނެވީ އައިސޮލޭޝަންގައި ކަމަށެވެ. މަބްރޫކް ވިދާޅުވީ ބަލީގެ އަލާމާތްްތައް ހުރި މީހާގެ ނަތީޖާ ނެގެޓިވް ކަމަށެވެ.
އަދި އެހެން ވަޒީރަކު ދިރިއުޅުއްވާ އިމާރާތެއް މޮނީޓަރިންގެ ހާލަތަށް ގެނެވުމާއި އެކު އެވަޒީރު ހުންނެވީ ގޭގައިކަމަށް ވެސް މަބްރޫކް ވަނީ ވިދާޅުވެފައެވެ. މަބްރޫކް ވިދާޅުވީ މޮނީޓަރިންގެ ހާލަތަށް ގެނެވުނީ އެ ވަޒީރު އުޅުއްވާ އެޕާޓްމެންޓެއް ނޫންކަމަށެވެ. އަދި އެ އެޕަރޓްމެންޓް ހުންނަ ފަންގިފިލާއެއްވެސް ނޫން ކަމަށެވެ.
މަބްރޫކް ވިދާޅުވީ ތިން ވަނަ ވަޒީރު ވަޑައިގެންނެވި ތަނެއްގެ ސަބަބުން އެ ވަޒީރުވެސް ހުންނެވީ އައިސޮލޭޝަންގައި ކަމަށެވެ. އެ ވަޒީރު ވަޑައިގެންނެވީ ޕޮޒިޓިވް ވި ދެ މީހަކު މަސައްކަތްކުރި އިހުސާން ފިހާރައަށް ކަމަށް މަބްރޫކް ވިދާޅުވިއެވެ. އެ ފިހާރައަށް ވަޑައިގަތުމުގެ ސަބަބުން އައިސޮލޭޓް ވުމަށް އަންގާފައިވާކަމަށާއި ޕްރޮސީޖަރ އާއި އެއްގޮތަށް ފެސިލިޓީއަކަށް ގެންދަވަން ޖެހޭކަމަށް ވާނަމަ ގެންދަވާނެ ކަމަށް ވެސް މަބްރޫކް ވިދާޅުވިއެވެ.
