ފެލައިނީ އަށް ވައިރަސް ޖެހިފައިވަނީ ޗައިނާއިން ކަމަށް ބެލެވޭ، ކްލޯޒް ކޮންޓެކްޓެއް އައިސޮލޭޝަންގައި: މަބްރޫކް
22 މާރިޗު 2020 | އާދީއްތަ 12:22ކޮވިޑް-19 އަށް ޕޮޒިޓިވް ވި ކަން އެނގިފައިވަނީ މާޗް މަހުގެ 20ގައި
މެންޗެސްޓަރ ޔުނައިޓެޑްގެ ކުރީގެ މިޑްފިލްޑަރު މައުރޯނޭ ފެލައިނީ
މެންޗެސްޓަރ ޔުނައިޓެޑްގެ ކުރީގެ މިޑްފީލްޑަރު މައުރޯނޭ ފެލައިނީ ކޮރޯނާވައިރަސް (ކޮވިޑް-19) ޖެހިފައިވަނީ ޗައިނާއިން ކަމަށް ބެލެވޭ ކަމަށް ކޮވިޑް-19 ޓާސްކްޕޯސްގެ ތަރުޖަމާނު މަބްރޫކް އަޒީޒް ވިދާޅުވެއްޖެ އެވެ.
ކޮވިޑް-19 އާ ގުޅޭ އެންމެ ފަހުގެ މަޢުލޫމާތު ހިއްސާކުރުމަށް އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކޮވިޑް-19 އަށް ފެލައިނީ ޕޮޒިޓިވް ވެފައިވާކަމުގެ މަޢުލޫމާތު ލިބިފައިވަނީ އޭނާ ރާއްޖެ އައިސް އެނބުރި ޗައިނާއަށް ދިޔަފަހުން ކަމަށެވެ.
ފެލައިނީ ރާއްޖެ އައިސްފައިވަނީ މިހިނގާ މާރޗް މަހުގެ 8 ގައި ކަމަށާއި، އެނބުރި ގޮސްފައިވަނީ 12 ގައި ކަމަށެވެ. އަދި އޭނާ ކޮވިޑް-19 އަށް ޕޮޒިޓިވް ވި ކަން އެނގިފައިވަނީ މިހިނގާ މާރޗް މަހުގެ 20 ގައި ކަމަށް މަބްރޫކް ވިދާޅުވިއެވެ.
އެކަމާއި ގުޅިގެން އަޅަން ޖެހޭ ފިޔަވަޅުތައް އަޅަމުންދާ ކަމަށް އޭނާ ވިދާޅުވިއެވެ. 14 ދުވަހަށް ބަލައިފި ނަމަ އެނާ އަށް ކޮވިޑް-19 ޖެހުނު ކަމަށް ބެލެވޭ ތާރީޚަކީ މި މަހުގެ 6 ވަނަ ދުވަސް ކަމަށް މަބްރޫކް ވިދާޅުވިއެވެ.
ނަމަވެސް ކޮންޓެކްޓް ޓްރޭސިންގެ މަސައްކަތްތައް ކުރިއަށްދާ ކަމަށާއި ކްލޯޒް ކޮންޓެކްޓެއް ގޮތަށް އައިޑެންޓިފައި ކުރެވުނު ފަރާތެއް އައިސޮލޭޝަނަށް ގެންދެވިފައިވާ ކަމަށް މަބްރޫކް ވިދާޅުވިއެވެ. ކޮންޓެކްޓް ޓްރޭސިންގ ގެ މަސައްކަތްތައް ކުރިއަށްދާ ވަރަކަށް ތަފުސީލުތައް ދެއްވާނެ ކަމަށް މަބްރޫކް ވިދާޅުވިއެވެ.
ފެލައިނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވިއިރު އޭނާއަކީ ޗައިނީސް ސުޕަރ ލީގުން ކޮރޯނާވައިރަސް (ކޮވިޑް-19) އަށް ޕޮޒިޓިވްވި ފުރަތަމަ ކުޅުންތެރިޔާއެވެ.
