މޮއިސް ކީން އަށް އެވަޓަން އިން ފިޔަވަޅު އަޅަނީ

ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސިވިލާތުން ކަނޑައަޅާފައިވާ ގަވާއިދުތަކާ ޚިލާފަށް މޮއިސް ކީން ޕާޓީއެއް ބޭއްވުމުން، އޭނާ އަށް ފިޔަވަޅު އަޅަން އެވަޓަން އިން ނިންމާފައިވާ ކަމަށް ރިޕޯޓުތައް ބުނެފި އެވެ.

އިޓަލީއަށް އުފަން އުމުރުން 20 އަހަރުގެ މޮއިސް ކީން ވަނީ އޭނާގެ އަމިއްލަ އެޕާޓްމަންޓުގައި ޕާޓިއެއް ބާއްވާފައެވެ. އަދި ޕާޓީގައި ކީން ކުރި ވީޑިއޯއެއް ވަނީ މީޑިއާގައި ދައުރުވެފައެވެ.

އެކަމާ ގުޅިގެން އެވަޓަން އިން ނެރުނު ބަޔާނެއްގައި ބުނެފައިވަނީ ސަރުކާރުން ކަނޑައަޅާފައިވާ ގަވާއިދުތަކާއި އެ ކްލަބުން ކަނޑައަޅާފައިވާ ގަވާއިދުތަކާ ޚިލާފަށް މި ދަނޑިވަޅުގައި ޕާޓީއެއް ބޭއްވުމުން އަންތަރީސް ވެއްޖެ ކަމަށެވެ. އަދި މިއީ އެ ކްލަބުގެ ކުޅުންތެރިއެއްގެ ފަރާތުން ފެނިގެންނުވާނެ އަމަލެއް ކަމަށްވެސް ވަނީ ބުނެފައެވެ. އަދި މި ބަޔާނުގައި އެވަޓަން އިން ވަނީ ހުރިހާ ކުޅުންތެރިންވެސް ގަވާއިދުތަކަށް ބޯލެނބުމަށް އިލްތިމާސް ކޮށްފައެވެ.

ރިޕޯޓުތައް ބުނާ ގޮތުން ކީން އަށް ފިޔަވަޅު އަޅަން މިހާރު ވަނީ ނިންމާފައެވެ. އެގޮތުން އެވަންޓަން އިން ކީން ޖޫރިމަނާ ކުރާނެ ކަމަށްވެސް ރިޕޯޓުތައް ބުނެއެވެ.

ކީން ޕާޓީއެއް ބޭއްވި މައްސަލަ ފެންމަތިވިއިރު، މީގެ ކުރިން ގަވާއިދުތަކާ ޚިލާފަށް ޕާޓީއެއް ބޭއްވުމުން މެންޗެސްޓާ ސިޓީގެ ޑިފެންޑަރު ކައިލް ވޯކާއަށް ފިޔަވަޅު އަޅަން އެ ކްލަބުން ވަނީ ނިންމާފައެވެ. އަދި އިޖުތިމާއީ ގައިދުރުކަމުގެ ގަވާއިދުތަކާ ޚިލާފަށް އަމަލުކުރުމުން، އާސެނަލްގެ ހުރިހާ ކުޅުންތެރިންނަށް ނަސޭހަތް ދީފައިވާއިރު، ޓޮޓެންހަމްގެ ކޯޗު ހޯސޭ މޮރީނިއޯ އާއި އެޓީމުގެ ބައެއް ކުޅުންތެރިންގެ ފަރާތުން އިޖުތިމާއީ ގައިދުރުކަމުގެ ގަވާއިދާ ޚިލާފު އަމަލުތައް ފެނުމުން ވަނީ މާފަށް އެދިފައެވެ. މީގެ އިތުރުން ހޯމް-އައިސޮލޭޝަންގެ ގަވައިދާ ޚިލާފުވުމުން ޗެލްސީން ވަނީ އެޓީމުގެ މޭސަން މައުންޓަށް ނަސޭހަތްތެރި ވެފައެވެ.