ފަތުރުވެރިކަމުގެ ދާއިރާއިން ގެންނަ ހަޒްމަޓް ސުއިޓާއި މާސްކުތައް މެއި އެކެއްގައި ލިބޭނެ: އަލީ ވަހީދު
27 އެޕްރީލު 2020 | ހޯމަ 12:22ޓެސްޓް ކުރަން ޖެހޭ ހާލަތްތަކުގައި ބަޖެޓާއި ވަސީލަތްތަކަށް ބަލާއިރު ރަނގަޅަށް ތައްޔާރުވެފައިވާ ކަމަށް އަލީ ވަހީދު ވިދާޅުވި
އަލީ ވަހީދު - ޓޫރިޒަމް މިނިސްޓަރ
ފަތުރުވެރިކަމުގެ ދާއިރާއިން އިސްނަގައިގެން ސިއްހީ ދާއިރާގައި މަސައްކަތްކުރާ ފަރާތްތަކަށް ދިނުމަށް ގެންނަ 5000 ހަޒްމަޓް ސުއިޓާއި 20،000 އެން ނައިންޓީފައިވް މާސްކް އަންނަ މެއި މަހުގެ 1 ގައި ލިބޭނެ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
ހޯމަ ދުވަހު ކުރިޔަށްދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ އިތުރު ހުރަސްތަކެއް ނާންނަ ކަމަށްވާނަމަ މެއި މަހުގެ 1 ގައި އެތަކެތި ލިބޭނެ ކަމަށެވެ. މީގެއިތުރުން ރާއްޖޭގައި ކޮވިޑް-19 އާ ގުޅިގެން ފިޔަވަޅުތައް އަޅަމުން ގެންދަނީ އެވަގުތުގެ ހާލަތަށް ބަލާފައި ކަމަށް މިނިސްޓަރ ވިދާޅުވި އެވެ.
ޓެސްޓްކުރަންޖެހޭ ހާލަތްތަކުގައި ބަޖެޓާއި ވަސީލަތްތަކަށް ބަލާއިރު ރަނގަޅަށް ތައްޔާރުވެފައިވާ ކަމަށް އަލީ ވަހީދު ވިދާޅުވި އެވެ.
ރާއްޖޭގައި މަސައްކަތްކުރާ ސިއްހީ އެހީތެރިންނަށް ބޭނުންވާ ވަރަށް ޕަރސަނަލް ޕްރޮޓެކްޓިވް އިކުޔެޕްމަންޓް (ޕީޕީއީ) ހުރިތޯ އުފައްދާ ސުވާލަށް ޖަވާބު ދެއްވަމުން ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވީ މިހާތަނަށް އައިއިރު ރެޕިޑް ރެސްޕޯޑް ޓީމުތަކަށް ޕީޕީއީ 1743 ސެޓް ހަވާލު ކުރެވިފައިވާކަމަށް މަބްރޫކް ވިދާޅުވިއެވެ. އަދި ހެލްތު މިނިސްޓްރީގެ ސްޓޮކްގައި 58،000 ސެޓް އެބަހުރިކަމަށް މަބްރޫކް ވިދާޅުވިއެވެ. މީގެއިތުރުން އެސްޓީއޯގަވެސް ޕީޕީއީ ސެޓްގައި ހިމެނޭ އެކި ތަކެތި ސްޓޮކްކޮށްފައި ހުރިކަމަށް މަބްރޫކް ވިދާޅުވިއެވެ.
ކޮވިޑް-19އަކީ ހަލުވިމިނުގައި ފެތުރޭ ބައްޔަކަށްވާއިރު އެމީހުންނަށް ފަރުވާދިނުމަށް މަސައްކަތްކުރާ ޞިއްޙީ އެހީތެރިންނަށް ރައްކާތެރިކަމުގެ ގޮތުން ބޭނުންކުރަންޖެހޭ ހުރިހާ އެއްޗެއް ލިބިފައި ހުރުމަކީ މުހިންމުކަމެކެވެ.
