ބިދޭސީންގެ ފަރާތުން މައުލޫމާތު ހޯދަން އުނދަގޫ، ހޭލުންތެރިކުރުވަން ޖެހޭ!
27 އެޕްރީލު 2020 | ހޯމަ 10:26އެމީހުން މައުލޫމާތު ދިނުމަށް ޖެހެލުންވޭ
މާލޭގައި ގިނަ ބިދޭސީން ތޮއްޖެހިގެން ދިރިއުޅެމުންދޭ
މާލެސިޓީން ކޮވިޑް-19ށް ޕޮޒިޓިވްވި ކޭސްތަކާ ގުޅުންހުރި މީހުން ހޯދުމަށް ގިނަ މަސައްކަތްތަކެއް ކުރަމުން އަންނަކަމަށާއި، ނަމަވެސް ޤަވާއިދާ ޚިލާފަށް ދިރިއުޅެމުންދާ ބިދޭސީންގެ ފަރާތުން މަޢުލޫމާތު ހޯދުމަށް ދަތިތަކާއި ކުރިމަތިވެފައިވާކަމަށް، ޑރ. އިބްރާހިމް އަފްޒަލް ވިދާޅުވެއްޖެއެވެ.
އާދިއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ކޮވިޑް-19 އާ ގުޅިގެން ޕޮޒިޓިވްވި ކޭސްތަކާ ގުޅުންހުރި މީހުން ހޯދުމަށް ގިނަ މަސައްކަތްތައް ކުރަމުން އަންނަކަމަށެވެ. ކޮންޓެކްޓްވި މީހުންގެ މަޢުލޫމާތުތައް ހޯދަމުންދާއިރު، އެންމެ އުދަނގޫވަނީ ބިދޭސީންގެ ފަރާތުން މަޢުލޫމާތު ހޯދުމަށް ކަމަށް ޑރ. އަފްޒަލް ވިދާޅުވިއެވެ.
ގިނަ ޢަދަދެއްގެ ބިދޭސީން ހަމައެކަނި މާލެސިޓީގައި ވެސް ދިރިއުޅެމުންދާކަން ފާހަގަކުރައްވައި، ޑރ. އަފްޒަލް ވިދާޅުވީ އެމީހުން މަޢުލޫމާތު ޙިއްސާކުރުމަށް ޖެހިލުންވާކަމަށެވެ. އަދި ވިދާޅުވީ ޞައްޙަ މަޢުލޫމާތު އެނގިގެން ބިދޭސީ މީހާގާތުން އޮޅުން ފިލުވަން އުޅުމުން އެކަމަށް ދެކޮޅު ހަދާކަމަށެވެ.
އެގޮތުން، ކޮވިޑް-19ގެ ނުރައްކާތެރިކަމާއި، ބަލީގެ ޢަލާމާތެއް ހުރިނަމަ މަޢުލޫމާތު ސިއްރު ނުކޮށް ޙިއްސާ ކުރުމުގެ މުހިންމުކަން އެމީހުންނަށް ވިސްނައިދީ، ހޭލުންތެރިކުރަންޖެހޭކަމަށް ޑރ. އަފްޒަލް ވިދާޅުވިއެވެ.
މާލެއިން އެންމެ ފުރަތަމަ ކޭސްއެއް ފެނިފައިވަނީ މި ހިނގާ އޭޕްރީލް މަހުގެ 15 ވަނަ ދުވަހުއެވެ. އޭގެ ފަހުން ދުވަހެއް ދުވަހަކަށް ކޭސްތަކުގެ ޢަދަދު ދަނީ އިތުރުވަމުންނެވެ. އެޗްޕީއޭއިން ޢާންމު ކޮށްފައިވާ މަޢުލޫމާތުތަކަށް ބަލާއިރު ރާއްޖެއިން ޕޮޒިޓިވްވީ މީހުންގެ ތެރެއިން 47.66 އިންސައްތަ މީހުންނަކީ ބަންގްލަދޭޝަށް ނިޞްބަތްވާ މީހުންނެވެ.
މި ޢަދަދުތައް ކުރިއަށް އޮތް ދުވަސްތަކުގެ ތެރޭގައި އިތުރުވާނެ ކަމަށް ވަނީ ބެލެވިފައެވެ. މިހާތަނަށް ޕޮޒިޓިވްވްވީ ބިދޭސީންގެ ތެރޭގައި ހިމެނޭ ގިނަ ފަރާތްތަކަކީ ބަލީގެ ހިރާސް ބޮޑުކަމަށް ފާހަގަކުރެވިފައިވާ ތަންތަނުން ދައުލަތުގެ ބެލުމުގެ ދަށަށް ގެންދެވިފައިވާ ފަރާތްތަކެވެ.
