މިޙާލަތުގަ ނަފުސާނީ އެހީތެރިކަން ބޭނުންވާ މީހުން 1425ށް ގުޅާ
މީގެކުރިން ކުރިން އެމްއާރްސީން މަސައްކަތްކުރަމުން އައީ ކަރަންޓީނު ފެސިލިޓީތަކުގައި ތިބި މީހުންނަށް ނަފްސާނީ އެހީތެރިކަން ފޯރުކޮށްދިނުމުގެ މަސައްކަތް
މާލެ
ރާއްޖޭގެ ކޮންމެ ހިސާބެއްގައިވެސް ކަރަންޓީނު އަދި އައިސޮލޭޝަނުގައި ތިބޭ މީހުންނަށާއި، ފްރޮންޓް ލައިންގައި މަސައްކަތްކުރާ މީހުންނަށް ނަފުސާނީ އެހީތެރިކަން ފޯރުކޮށްދިނުމަށް މޯލްޑީވިއަން ރެޑް ކްރެސެންޓުން ޤާއިމުކޮށްފައިވާ ހޮޓްލައިން ނަންބަރު 1425ށް ގުޅުމުން އެހީތެރިކަން ލިބިގެންދާނެކަމަށް ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް ޢަޒީޒު ވިދާޅުވެއްޖެއެވެ.
މީގެކުރިން ކުރިން މޯލްޑީވިއަން ރެޑް ކްރެސެންޓުން މަސައްކަތްކުރަމުން އައީ ކަރަންޓީނު ފެސިލިޓީތަކުގައި ތިބި މީހުންނަށް ނަފުސާނީ އެހީތެރިކަން ފޯރުކޮށްދިނުމުގެ މަސައްކަތެވެ. ނަމަވެސް މުޅި ރާއްޖެއަށް ކޮވިޑް-19 ފެތުރުމުގެ ފުރުޞަތު އޮތުމާއި ރާއްޖޭގެ އެކި ހިސާބުތައް މޮނިޓަރިން އަދި ކަރަންޓީނަށް ލަމުންދާތީ އެޚިދުމަތް ފުޅާކުރުމަށް ރެޑް ކްރެސެންޓްގެ ފަރާތުން މަސައްކަތްކުރައްވާކަމަށް މީގެކުރިން މަބްރޫކް ވަނީ ވިދާޅުވެފައެވެ.
މޯލްޑީވިއަން ރެޑް ކްރެސެންޓަށް 2695 ފޯންކޯލެއް ނަފުސާނީ އެހީތެރިކަން ހޯދުމަށް ލިބިފައިވާކަމަށް މަބްރޫކް ވަނީ ކުރިން ވިދާޅުވެފައެވެ. ކޮވިޑް-19 އާއި ގުޅިގެން މާލެ ސިޓީ ހިމެނޭ ޞަރަޙަައްދު ފުރަބަންދު ކޮށްފައިވާއިރު ގިނަ ބަޔަކަށް ދިމާވާ ނަފުސާނީ މައްސަލަތަކަށް އޮންލައިން މެދުވެރިކޮށް އެހީތެރިކަން ފޯރުކޮށްދިނުމުގެ މަސައްކަތް އެކި ފަރާތްތަކުން އަންނަނީ ކުރަމުންނެވެ. އެގޮތުން ތަފާތު އެކި ޖަމްޢިއްޔާތަކުން އަންނަނީ މިމަސައްކަތް ކުރަމުންނެވެ.
