މިފްކޯއިން މަސްވެރިންނަށް 70 މިލިއަން ރުފިޔާ ދީފި
27 އެޕްރީލު 2020 | ހޯމަ 07:47މިއީ މިދިޔަ މަހުގެ 26ން މި މަހުގެ 14 ވަނަ ދުވަހުގެ ނިޔަލަށް މަސްވެރިންނަށް ނުދީ ހުރި ފައިސާ
މަސްވެރިންތަކެއް
މަސްވެރިންނަށް ނުދެވި ހުރި ފައިސާގެ ތެރެއިން 70 މިލިއަނަށް ރުފިޔާ ދީފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)އިން ބުނެފިއެވެ.
ރާއްޖެއެމްވީއަށް މަޢުލޫމާތު ދެއްވަމުން މިފްކޯގެ މެނޭޖަރު އަޙްމަދު ނަވާޒް ރަޝީދު ވިދާޅުވީ މިދިޔަ ބުރާސްފަތި ދުވަހާއި ހަމައަށް 70 މިލިއަން ރުފިޔާ ދީފައިވާކަމަށެވެ. މިއީ، މިދިޔަ މަހުގެ 26ން މި މަހުގެ 14 ވަނަ ދުވަހުގެ ނިޔަލަށް މަސްވެރިންނަށް ނުދީ ހުރި ފައިސާގެ ބައެއްކަމަށްވެސް އޭނާ ފާހަގަކުރެއްވިއެވެ.
މަސްވެރިންނަށް އަދި ދޭންޖެހޭ ފައިސާ ހުންނާނެކަމަށާއި މިހާރު ދޭން ހުންނާނީ ވަރަށް ކުޑަ ޢަދަދެއްކަމަށް ނަވާޒް ވިދާޅުވިއެވެ. އަންނަ ހަފުތާގެ ކުރީކޮޅުގައި އެ ފައިސާވެސް މަސްވެރިންނާއި ޙަވާލުކޮށް ނިމޭނެކަމަށް އޭނާ ވިދާޅުވިއެވެ.
މަސްވެރިންނަށް ފައިސާ ދިނުމުގައި ދަތިތަކާއި ކުރިމަތިވާ ކަމަށް ރާއްޖެޓީވީގެ ފަލަސުުޚީ ޕުރޮގުރާމުގައި ވާހަކަ ދައްކަވަމުން މިފްކޯގެ ސީއީއޯ އިސްމާއިލް ފައުޒީ ވަނީ މީގެ ކުރިން ވިދާޅުވެފައެވެ. އެގޮތުން ބައިނަލްއަޤުވާމީ މަރކެޓުގައި އަގުތައް ހުރިގޮތުން މިފްކޯއަށްވެސް ވަގުތުން ފައިސާ ދިނުމުގައި ދަތިތަކެއް ހުންނަ ކަަމަށާއި، ސަރުކާރުގެ ވިސްނުން ހުރީ ގަންނަ މަސް ރާއްޖޭގައި ސްޓޯރ ކުރުމުގެ ހަރުދަނާ ނިޒާމެއް ޤާއިމު ކުރުންކަމަށް އޭނާ ވިދާޅުވިއެވެ.
ކޮވިޑް-19އާ ގުޅިގެން އެއްރަށުން އަނެއް ރަށަށް ދަތުރުކުރުން ހެލްތު ޕްރޮޓެކްޝަން އޭޖެންސީ(އެޗްޕީއޭ)އިން މަނާކުރި ނަމަވެސް، މަސްވެރިކަން ކުރާ އުޅަނދުފަހަރުތައް މަހަށްދިއުމުގެ ހުއްދަދޭން މިނިސްޓްރީ އޮފް ފިޝަރީޒް އެންޑް އެގްރިކަލްޗަރުން ވަނީ ނިންމާފައެވެ.
