ލޮކްޑައުންއާ ޚިލާފުވެގެން މިހާތަނަށް 49 މީހަކު ހައްޔަރު ކޮށްފައިވޭ
26 އެޕްރީލު 2020 | އާދީއްތަ 11:34ނަވީން ވިދާޅުވީ 47 މީހުން ހައްޔަރު ކޮށްފައިވަނީ މާލެއިން ކަމަށް
މާލެ ސިޓީ
އޭޕްރީލް މަހުގެ 15 ވަނަ ދުވަހުން ފެށިގެން މާލެ ލޮކްޑައުން ކޮށްފައިވާއިރު މިހާތަނަށް އައިއިރު ލޮކްޑައުންނާ ޚިލާފުވެގެން 49 މީހަކު ހައްޔަރުކޮށްފައިވާ ކަމަށް އެސިސްޓަންޓް ކޮމިޝަނަރު އޮފް ޕޮލިސް އިސްމާއިލް ނަވީން ވިދާޅުވެއްޖެއެވެ.
މިހާލަތުގައި ފުލުހުން ކުރަމުންގެންދާ މަސައްކަތްތަކާއި ގުޅޭގޮތުން އެންމެ ފަހުގެ މައުލޫމާތު ހިއްސާ ކުރައްވަމުން ނަވީން ވިދާޅުވީ މީގެތެރެއިން 47 މީހުން ހައްޔަރު ކޮށްފައިވަނީ މާލެއިން ކަމަށާއި ދެ މީހުން ހައްޔަރު ކޮށްފައިވަނީ ހުޅުމާލެއިން ކަމަށެވެ. އަދި ލޮކްޑައުނާ ޚިލާފުވެގެން ހޮނިހިރު ދުވަހު 18 މީހުން ހައްޔަރުކޮށްފައިވާ ކަމަށެވެ. މީގެތެރެއިން 17 މީހުން ހައްޔަރުކުރީ މާލެއިން ކަމަށާއި އަނެއް މީހާ ހައްޔަރު ކުރީ ހުޅުމާލެއިން ކަމަށް ނަވީން ވިދާޅުވިއެވެ.
އާދިއްތަ ދުވަހާ ހަމައަށް މާލެއިން 543 މީހުން ޖޫރިމަނާ ކޮށްފައިވާކަމަށް ނަވީން ވިދާޅުވި އެވެ. އަދި ހުޅުމާލެއިން 53 މީހަކު ވިލިމާލެއިން 32 މީހަކު ޖޫރިމަނާކޮށްފައިވާ ކަމަށް ނަވީން ވިދާޅުވިއެވެ. މީގެއިތުރުން ހޮނިހިރު ދުވަހު ގަވާއިދާ ޚިލާފަށް ބޭރުގައި އުޅެގެން 167 މީހަކު ޖޫރިމަނާ ކޮށްފައިވާ ކަމަށާއި، މީގެތެރެއިން 139 މީހުން ޖޫރިމަނާކުރީ މާލެއިން ކަމަށް ނަވީން ވިދާޅުވިއެވެ. އަދި 23 މީހުން ހުޅުމާލެއިން ޖޫރިމަނާކުރި އިރު 5 މީހުން ވިލިމާލެއިން ވަނީ ޖޫރިމަނާކޮށްފައެވެ.
މާލެ ސިޓީން ކޮވިޑް-19 އަށް ޕޮޒިޓިވްވި މީހަކު ފެނުމާއި ގުޅިގެން އޭޕްރީލް މަހުގެ 15 ވަނަ ދުވަހުން ފެށިގެން 30 ވަނަ ދުވަހާ ހަމައަށް މާލެ ސިޓީ ވަނީ ލޮކްޑައުންކޮށްފަ އެވެ. ލޮކްޑައުންކޮށްފައި އޮންނައިރު ހުއްދަ ދެވިފައި ނޫން މީހުން މަގުމަތީގައި އުޅޭނަމަ 1000 ރުފިޔާއިން ޖޫރިމަނާކުރާނެ އެވެ.
