ބިންމާގެ ވާހަކަ ފޮތްތައް އޮންލައިންކޮށް އާންމުންނަށް ހިލޭ
26 އެޕްރީލު 2020 | އާދީއްތަ 10:40ބިންމާގެ ފޭސްބުކް ޕޭޖް ލިންކަށް ފިތާލުމުން ވާހަކަ ޑައުންލޯޑު ކުރެވޭނެ
ބިންމާ ލިޔެފައިވާ ވާހަކައެއް
މަޝްހޫރު ވާހަކަ ލިޔުންތެރިޔާ ބިންމާ އިބްރާހިމް ވަހީދުގެ ވާހަކަ ފޮތްތައް އޮންލައިންކޮށް އާންމުންނަށް ހިލޭ ހުޅުވާލައިފިއެވެ.
ބިންމާގެ ވާހަކަ ފޮތްތައް އާންމުންނަށް ހިލޭ ހުޅުވާލާފައި މިވަނީ އޭނާގެ ފޭސްބުކް ޕޭޖު މެދުވެރިކޮށެވެ. ފޮތް ޑައުންލޯޑުކޮށް ތިން ގޮތެއް އާންމުންނަށް ވަނީ ހުޅުވާލާފައެވެ. އެގޮތުން ފުރަތަމަ ގޮތަކީ ބިންމާގެ ޕޯސްޓުގައި އިންނަ ލިންކް މެދުވެރިކޮށް ފޮތްތައް ގޫގަލް ޑްރައިވްއަށް ޑައުންލޯޑު ކޮށްލުމެވެ. އަދި ދެވަނަ ގޮތަކީ ފޭސްބުކް މެދުވެރިކޮށް ޕްރައިވެޓް މެސެޖަކުން އެދުމެވެ. މީގެ އިތުރުން ތިން ވަނަ ގޮޮތަކީ ޕޭޖުގެ ނަންބަރަށް 7777770 ވައިބަރ ކުރުމުން ވީވަރަކުން އެންމެނަށް ވެސް އީބުކްސް ލިންކް ފޮނުވައިދެމުންދާނެއެވެ.
ރާއްޖެއެމްވީއާ ވާހަކަ ދައްކަަވަމުން ބިންމާ ބުނުއްވީ މި ފުރުސަތު އާންމުންނަށް ހުޅުވާލީ މި ދަނޑިވަޅުގައި އާންމުންނަށް ކޮންމެވެސް ކަހަލަ އުފަލެއް ދޭން ބޭނުންވާތީ ކަމަށެވެ. އެގޮތުން ކޮންމެ ދުވަހަކު ވެސް ވާހަކަ ފޮތެއް ނެރެމުންދާނެކަން ފާހަގަކޮށް ބިންމާ ބުނުއްވީ ވަރަށް ގިނަ އާންމުން ކުޑަކުދިންގެ ވާހަކަތައް އޮންލައިންކޮށް ކިޔޭނެ ގޮތް ހަމަޖެއްސުމަށް އެދެމުންދާ ކަމަށެވެ. އެހެންނަމަވެސް ކުޑަކުދިންގެ ވާހަކައިގެ ސޮފްޓެއް ނެތްކަމުގައެވެ.
މިހާތަނަށް އައިރު 36 ވާހަކައެއް އޮންލައިންކޮށް ނެރެފައިވާނެ ކަމަށާއި ޖުމްލަ 918 ވަރަކަށް ވާހަކަ ސޮފްޓް ކޮޕީ އުޅޭނެ ކަމަށް ބިންމާ ބުނުއްވިއެވެ. މީގެ ތެރޭގައި ބިރުވެރި ވާހަކަތަކާއި ލޯބީގެ ވާހަކަތައް ވެސް ހިމެނެއެވެ.
މިދަނޑިވަޅަކީ އެކަކު އަނެކަކަށް އެހީތެރިކަން ފޯރުކޮށްދީ އެއްބައިވަންތަކަމުގެ ރީތި މަންޒަރު ދައްކަންވީ ވަގުތު ކަމަށް ބިންމާ ބުންޏެވެ.
ބިންމާ އަކީ ހިޔާލީ އަދި ހަޤީޤީ ހާދިސާތަކުގެ މައްޗަށް ބިނާކޮށްފައިވާ ގިނަ ވާހަކަތައް ލިޔުއްވާފައިވާ ބޭކަލެކެވެ. އަދި އޭނަގެ ވާހަކަތައް ކިޔަން ގިނަ ބަޔަކު ޝައުޤުވެރިވެއެވެ.
