"ރޮކް ޕޭޕަރ ސިޒަރ" ކުޅެގެން ބޮޑު އަދަދަކުން ދަރަނިވެރިވުމުން ސަލާމަތް ކޮށްދިނީ ކޯޓުން

"ރޮކް ޕޭޕަރ ސިޒަރ" ކުޅެގެން ފަސްލައްކައަށްވުރެ ގިނަ އެމެރިކާ ޑޮލަރުން ދަރަނިވެރިވި މީހަކު ކިއުބެކްގެ ކޯޓުން ސަލާމަތް ކޮށްދީފިއެވެ.

2011 ވަނަ އަހަރުގެ ޖެނުއަރީ މަހު ހިނގި މި ހާދިސާގައި އެޑްމަންޑް މާކް ހޫޕަރ އޭނާގެ އެކުވެރިޔާ މައިކަލް ޕްރިމޯއާއެކު ރޮކް ޕޭޕަރ ސިޒަރ ގެ 3 ބުރު ކުޅެގެން ބަލިވެއްޖެނަމަ 517،000 އެމެރިކާ ޑޮލަރުދޭނެ ކަމަށް ބުނެ ބެޓްކުރިއެވެ. ނަމަވެސް 3 ބުރުގައިވެސް އޭނާ ބަލިވުމުން ދަރަނިވެރިވެ، ގެވެސް ރަހުނު ކުރަން ޖެހުނެވެ. އަދި އެ މައްސަލަ ކޯޓުގައި ހިނގަމުންގޮސް، އެންމެ ފަހުން ކޯޓުން މިވަނީ އިސްތިއުނާފް މަރުޙަލާގައި އެ މައްސަލަ ނިންމާފައެވެ.

ކިއުބެކްގެ ޤާނޫނު ބުނާގޮތުން ބެޓެއް ކޮށްފިނަމަ އެ ބެޓެއް ކާމިޔާބުވާން ޖެހޭނީ ހަމައެކަނި އޭނާގެ އަމިއްލަ ހުނަރާއި ޤާބިލިއްޔަތުގެ ސަބަބުން ކުރާ ކަމަކުންނެވެ. އަދި މީހެއްގެ ނަސީބު ނިޔާކުރާ ގޮތުން ދިމާވާ ކަމެއްގެ މައްޗަށް ބެޓެއް ނުކުރެވޭނެއެވެ.

އޭގެ އިތުރުން، އެފަދަ ބެޓެއް ކޮށްގެން ދޭންޖެހޭ ބަދަލަކީވެސް އެންމެ އެކަށީގެންވާ އަދި ކުރާ ބެޓަކާ ނުބައްދަލު އަގަކަށްވެގެން ނުވާނެކަމަށްވެސް ކިއުބެކްގެ ޤާނޫނުން ލާޒިމުކުރެއެވެ. އެހިސާބުން ކޯޓަށް އުފެދުނު ސުވާލަކީ ރޮކް ޕޭޕަރ ސިޒަރ ކުޅެގެން ކުރާ ބެޓް ކާމިޔާބުވަނީ މީހާގެ ހުނަރުންތޯ ނުވަތަ ނަސީބުންތޯއެވެ.

މި މައްސަލައިގައި 2017 ވަނަ އަހަރު ކުރި ހުކުމުގެ އިސްތިއުނާފް މަރުޙަލާގެ ހުކުމް އިއްވާފައިވާއިރު، 2017 ވަނަ އަހަރުގެ ހުކުމުގައި ބުނެފައިވަނީ ރޮކް ޕޭޕަރ ސިޒަރ ގޭމްއިން މޮޅުވުމުގައި މީހާގެ ހުނަރު ބޮޑު ރޯލެއް އަދާކުރެއެވެ. އެގޮތުން މީހާގެ ސްޕީޑާއި، ދެނެގަތުމުގެ ގާބިލިއްޔަތު ފަދަ ކަންކަމުން މި ގޭމް ކާމިޔާބުވުމުގައި އިސް ދައުރެއް އަދާކުރާއިރު، އެ ޙާލަތުގައި މިއީ ބެޓެއްކަމަށް ބެލެވިދާނެ ކަމަށް އޭރު ކޯޓުން ޙުކުމްކޮށްފައިވެއެވެ.

ނަމަވެސް މި މައްސަލައިގެ އިސްތިއުނާފް މަރުޙަލާގައި ޖަސްޓިސް ޗެޓްލިން ވަނީ ބެޓްކޮށްގެން ދޭން ޖެހިފައިވާ ބަދަލަކީ ކުރި ބެޓާ އެކަށީގެންވާ ބަދަލަކަށް ނުވާތީ ބެޓެއް ފުރިހަމަވުމުގެ އުންސުރުތައް މި ޙާލަތުގައި ފުރިހަމަނުވާކަމަށް ވިދާޅުވެފައެވެ. އަދި އެ ނިންމުން އިސްތިއުނާފުން ވަނީ ދަމަހައްޓާފައެވެ. އެއާއެކު، އެޑްމަންޑް 517،000 އެމެރިކާ ޑޮލަރު ދޭން ނުޖެހޭނެކަމަށް އެންމެ ފަހުން އިސްތިއުނާފް ކޯޓުން މިވަނީ ނިންމާފައެވެ.

ރޮކް ޕޭޕަރ ސިޒަރ އަކީ އަތްތިލައިގެ ބޭނުންކޮށްގެން ކުޅޭ ކުޅިވަރެކެވެ. އެގޮތުން މި ކުޅިވަރުގައި 3 ގޮތަކަށް އަތްތިލަ ހަރަކާތްތެރި ކުރެވޭއިރު، ޙަރަކާތްތައް ދަރަޖަކުރެވިގެންދާ ގޮތުން މޮޅުވާ މީހާ ކަނޑައެޅިގެން ދެއެވެ. އަދި އެ 3 ހަރަކާތަކީ ރޮކް (ގާ) ، ޕޭޕަރ (ކަރުދާސް) އަދި ސިޒަރ (ކަތުރު) ރަމްޒުކޮށްދޭ ހަރަކާތްތަކެކެވެ.