ޕޮޒިޓިވްވި މީހުންގެ ކޮންޓެކްޓުންގެ އަދަދު 1000ށް ވުރެ މައްޗަށް!
26 އެޕްރީލު 2020 | އާދީއްތަ 04:26މިހާތަނަށް ކޮންޓެކްޓުންގެ ގޮތުގައި 1943 މީހަކު ފާހަގަކުރެވިފައިވޭ
ކޮންޓެކްޓްވި މީހުންގެ އަދަދު އުންމީދު ކުރި ގޮތާ ހިލާފަށް ގިނަ
ކޮވިޑް-19އިން ޕޮޒިޓިވްވި މީހުންނާ މިހާތަނަށް ކޮންޓެކްޓުންގެ ގޮތުގައި 1000ށް ވުރެ ގިނަ މީހުން ފާހަގަކުރެވިފައިވާ ކަމަށް ކޮވިޑް-19 ޓާސްކް ފޯހުގެ ތަރުޖަމާނު މަބްރޫކު އަޒީޒް ވިދާޅުވެއްޖެ އެވެ.
ކޮވިޑް-19ގެ އެންމެފަހުގެ މައުލޫމާތު ހިއްސާ ކުރުމަށް ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކޮވިޑް-19އަށް ޕޮޒިޓިވްވި މީހުންނާ ކޮންޓެކްޓް ޓްރޭސިން ހެދުމުގެ މަސައްކަތްތައް ކުރަމުންދާ ކަމަށެވެ.
އެގޮތުން މިހާތަނަށް ކޮންޓެކްޓުންގެ ގޮތުގައި 1943 މީހަކު ފާހަގަކުރެވިފައިވާ ކަމަށް މަބްރޫކް ވިދާޅުވިއެވެ.
ހޮނިހިރު ދުވަހުގެ ރޭ 00:35ގެ ނިޔަލަށް މުޅި ރާއްޖެއިން 241ގެއެއް ވަނީ މޮނިޓަރިންގެ ހާލަތަށް ގެނެވިފައެވެ. އަދި ފިހާރަތާކައި ކްލިނިކްތައް ހިމެނޭ ގޮތަށް 31 ތަނެއް މޮނިޓަރިންގެ ހާލަތަށް ގެނެސްފައިވާއިރު، ރާއްޖޭގެ 22 ރަށެއް މޮނިޓަރިންގެ ހާލަތަށް ގެނެވިފައިވެއެވެ.
ކޮވިޑް-19އިން ޕޮޒިޓިވްވި މީހުންނާ މިހާތަނަށް ކޮންޓެކްޓުންގެ ގޮތުގައި 1943 މީހުން ފާހަގަކުރެވިފައިވާ ކަމަށް މަބްރޫކް ވިދާޅުވެފައިވާއިރު، މޭލެ ސިޓީން މިމަހުގެ 15 ވަނަ ދުވަހު ފެނުނު ފުރަތަމަ ކޭސްގައި ވެސް ޑައިރެކްޓް ކޮންޓެކްޓުން، އުންމީދު ކުރި ގޮތާ ހިލާފަށް ގިނަކަން ފާހަގަކޮށް މަބްރޫކް ކަންބޮޑުވުން ފާޅުކޮށްފައިވެއެވެ. އަދި މާލެ ސިޓީ ލޮކްޑައުން ކުރުމާއެކު ކޮންޓެކްޓް ޓްރޭސިންގެ މަސައްކަތްތައް ކުރުމަށް އެތައް ގުނައަކުން ފަސޭހަވެގެން ދިޔަކަން ފާހަގަކުރެއްވިއެވެ.
