އަމާޒު ބޯޓުގެ ކެޕްޓަން ޕޮޒިޓިވްވުމުން، ގިނަ ކޭސްތަކެއް ފެނިދާނެ ކަމުގެ ބިރު
25 އެޕްރީލު 2020 | ހޮނިހިރު 22:19ކޮންޓެކްޓް ޓްރޭސިންގެ ތެރެއިން 51 މީހަކު ވަނީ ފާހަގަވެފައި
އަމާޒް ބޯޓު
މި މަހުގެ 15 ވަނަ ދުވަހު މާލެއިން ފުރައިގެން އުތުރުގެ އަތޮޅުތަކަށް ދަތުރު ކުރި ''އަމާޒް'' ބޯޓުގެ ކެޕްޓަން ކޮވިޑް-19 އަށް ޕޮޒިޓިވްވެ އެ ބޯޓުން ދަތުރު ކުރި ގިނަ ބަޔަކަށް ބަލި ޖެހިދާނެ ކަމުގެ ބިރު ބޮޑުވެއްޖެއެވެ.
ހޮނިހިރު ދުވަހު ނެޝަނަލް އިމަރޖެންސީ ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓެކްނިކަލް އެޑްވައިޒަރީ ގްރޫޕްގައި ހިމެނިވަޑައިގަންނަވާ ޑރ. އިބްރާހިމް އަފްޒަލް ވިދާޅުވީ، ރާއްޖެއިން ކޮވިޑް-19 އަށް 133 ވަނަ އަށް ޕޮޒިޓިވްވި މީހާއަކީ ''އަމާޒު'' ނަމަކަށް ކިޔާ ބޯޓުގެ 49 އަހަރުގެ ދިވެހި ކެޕްޓަން ކަމަށެވެ. އެމީހާ ބެހޭ އިތުރު މައުލޫމާތެއް އޭނާ ހާމައެއް ނުކުރައްވައެވެ. މައުލޫމާތު ލިބިފައިވާ ގޮތުގައި އެމީހާ އަކީ ށ. ނަރުދޫގެ މީހެކެވެ.
އެ ކޭސްއާ ގުޅިގެން ވަރަށް ބޮޑަށް އިތުރު ކްލަސްޓަރ ފެނިދާނެ ކަމުގެ ބިރު އޮތުުމުން ކޮންޓެކްޓް ޓްރޭސިންގެ މަސައްކަތް ވަރަށް ހަލުވިކަމާއި އެކު ކުރިޔަށްދާ ކަމަށާއި، މިހާތަނަށް އެ ކޮންޓެކްޓް ޓްރޭސިންގެ ތެރެއިން 51 މީހަކު ފާހަގަކުރެވިފައިވާ ކަމަށް ޑރ. އަފްޒަލް ވިދާޅުވިއެވެ.
''އަމާޒު'' ބޯޓް މާލެއިން ފުރާފައިވަނީ މާލެއިން ފުރަތަމަ ކޭސް ފެނުނު ދުވަސް ކަަމަށްވާ އޭޕްރީލް މަހުގެ 15 ވަނަ ދުވަހު ދޭއް ޖެހިއިރު 98 މީހުންނާ އެކުއެވެ. އެ ބޯޓު ނަރުދޫ އަށް ގޮސްފައިވަނީ 16 ވަނަ ދުވަހުއެވެ.
މައުލޫމާތު ލިބިފައިވާ ގޮތުގައި ކޮވިޑް-19 އަލާމާތްތައް ފެނިގެން މި މަހުގެ 18 ވަނަ ދުވަހު އަމާޒު ބޯޓުގެ ކެޕްޓަން ވަނީ ށ. އަތޮޅު ހޮސްޕިޓަލަށް ދައްކާފައެވެ. ހޮސްޕިޓަލަށް ދެއްކުމުން އެ މީހާގެ ސާޕްމަލް 23 ނަގައި އޭނާގެ ޓެސްޓްތައް ހަދަން މާލެ ފޮނުވާފައި އެ ޓެސްޓުގެ ނަތިއްޖާ ލިބިފައިވަނީ ހޮނިހިރު ދުވަހުއެވެ.
ޑރ. އަފްޒަލް ވަނީ، އެ ބޯޓުން ދަތުރުކުރި ހުރިހާ ފަރާތްތަކެއްވެސް އެޗްޕީއޭ އަށް ރިޕޯޓް ކުރުމަށް އަންގާފައެވެ. އޭނާ ވިދާޅުވީ، އެ ބޯޓުން ދަތުރުކުރި މީހުންގެ ތެރޭގައި ފަސް މީހެއްގެ ފަރާތުން ކޮވިޑް-19 ގެ އަލާމާތްތައް ފެނިފައިވާ ކަމަށެވެ.
