މާލެގައި އާއްމުންގެ ތެރޭގައި ކޮވިޑް-19 ކޭސްތަކެއް ފެތުރެން ފެށި ދަނޑިވަޅުގައި ސާމްޕަލްތައް ނެގުމާއި ޓެސްޓު ކުރުމުގައި ލަސްތަކެއް ހުރި ކަމަށް ގަބޫލުފުޅު ކުރައްވާ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
ހޮނިހިރު ދުވަހު މެންދުރު ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓަރު ވިދާޅުވީ، މާލެއިން ކޮވިޑް-19 ފުރަތަމަ ކޭސްތައް ފެންނަން ފެށި ދަނޑިވަޅަކީ ކަރަންޓީނުގައި ތިބި މީހުން ކަރަންޓީނުން ދޫކޮށްލަމުން ދިޔަ ދަނޑިވަޅަކަށްވާތީވެ އާއި އެ މީހުންގެ ސާމްޕަލްގެ އިތުރުން ފުރަތަމަ ކޭސްތަކާއި ގުޅުން ހުރި މީހުންގެ ސާމްޕަލްތައް ޓެސްޓު ކުރުމުގައި ލަސްތަކެއް ދިމާވި ކަމަށެވެ.
ކަރަންޓީނުގައި ތިބި މީހުންގެ ސާމްޕަލްތަކާއި ބަލި ފެންނަން ފެށުމާއި އެކު ނެގި ސާމްޕަލްތަކާއި، ކޮންޓެކްޓް ޓްރޭސިންގެ ތެރެއިން ހައި ރިސްކު މީހުންގެ ސާމްޕަލްތަކާއި ސިމްޓޮމޮޓިކް މީހުން ފެންނަން ދިޔަ ވަރަށް އެ މީހުންގެ ސާމްޕަލް ތަކާއި އެއް ފަހަރަކާއި މިފަދަ ކަމެއް ދިމާވީމަ ލަސްތަކެއް ފާހަގަކުރެވުނުއަބްދުﷲ އަމީން - ހެލްތް މިނިސްޓަރު
އަމީން ވިދާޅުވީ، އިތުރު އިންތިޒާމްތަކެއް ހަމަޖައްސައި މިހާރު ސާމްޕަލް ނެގުމާއި ޓެސްޓު ކުރުމުގެ ކަންތައްތައް ހައްލު ކުރެވެމުންދާ ކަމަށެވެ. މިނިސްޓަރު ވިދާޅުވީ، ރާއްޖެއިން އެންމެ ފުރަތަމަ ބަލި ފެނުނު ކުރެއްދޫ އައިލެންޑް ރިސޯޓްގެ މުވައްޒަފުންގެ ސާމަޕްލްތައް ޓެސްޓު ނުކުރެވި ގިނަ ދުވަސްތަކެއް ވެފައިވާ ކަމަށާއި, އެ މުވައްޒަފުންގެ ސާމްޕަލްތަކަށް އިސްކަންދީގެން ޓެސްޓު ކުރުމުގެ މަސައްކަތް މިހާރު ކުރަމުންދާ ކަމަށެވެެ.
މާލެއިން އެންމެ ފުރަތަމަ ކޮވިޑް-19 ގެ ކޭސްއެއް ފެނިފައިވަނީ މި މަހުގެ 15 ވަނަ ދުވަހުއެވެ. އެއާއި އެކު އާއްމުންގެ ތެރޭގައި ބަލި ފެތުރެން ފަށާފައިވާ ކަމަށް ހެލްތް މިނިސްޓްރީން ވަނީ ހާމަކޮށްފައެވެ. މިނިސްޓަރު އަމީން އަށް ލަފާއަރުވާ ޓެކްނިކަލް އެޑްވައިޒަރީ ގްރޫޕް (ޓެގް) އިން ހާމަކޮށްފައިވާ ގޮތުން އާއްމުންގެ ތެރޭގައި ބަލި ފެތުރުން ފަށާފައިވާތާ ތިން ހަފްތާއެއްވަރު ވެދާނެއެވެ. ހެލްތް މިނިސްޓްރީން ވަނީ ބަލި ފެތުރިފައިވާ މިންވަރު ބަަލަން ކޮމިއުނިޓީ ސަވޭލަންސް ފަށަން ނިންމާފައެވެ.
