ނޭމާ އާއި ލަޓާރޯ މާޓިނޭޒް ހޯދަން ބާސެލޯނާއިން މިހާރު މަސައްކަތް ނުކުރާ ކަމަށް ލަލީގާގެ ރައީސް ހަވިއޭ ޓެބާސް ވިދާޅުވެއްޖެ އެވެ.

މީގެ ކުރިން މީޑިއާތަކުން ވަނީ ކުރިއަށް އޮތް ހޫނު މޫސުމުގެ ޓްރާންސްފާ ބާޒާރުގައި ނޭމާ އާއި މާޓިނޭޒް އަށް ބާސާއިން ބިޑު ކުރާނެ ކަމަށް ރިޕޯޓުކޮށްފައެވެ.

އެގޮތުން ޕީއެސްޖީގެ ނޭމާ އަލުން އަނބުރާ ހޯދުމަށް ކުރާ މަސައްކަތުގެ ތެރެއިން ބާސާއިން އެ ޓީމުގެ ފްރާންސް ފޯވާޑް އެންޓޮއިން ގްރީޒްމަން އާއި ނޭމާ ބަދަލުކުރަން ހުށަހަޅަން ތައްޔާރުވަމުން އަންނަ ކަމަށް ވަނީ ރިޕޯޓުކޮށްފައެވެ. އަދި ލަޓާރޯ މާޓިނޭޒްގެ ސޮއި ހޯދުމަށް ބާސާ އިން އިންޓަ މިލާނަށް ކުޅުންތެރިން ހުށަހަޅަން ނިންމާފައިވާ ކަމަށްވެސް ރިޕޯޓުތައް ވަނީ ބުނެފައެވެ. އެގޮތުން މާޓިނޭޒް ހޯދުމަށް ބާސާއިން އެޓީމުގެ ޑިފެންޑަރު ނެލްސަން ސެމޭޑޯ އިންޓައަށް ހުށަހަޅަން ތައްޔާރަށް އޮތް ކަމަށާއި، އިންޓައިންވެސް ސެމޭޑޯ އަށް ޝައުގުވެރިވާ ކަމަށް ރިޕޯޓުތައް ވަނީ ބުނެފައެވެ.

އެކަމަކު ދާދި ފަހުން ލަލީގާގެ ރައީސް ހަވިއޭ ޓެބާސް ވިދާޅުވީ ކޮރޯނާވައިރަސް (ކޮވިޑް-19) އާ ގުޅިގެން ބާސާއަށް ވެސް މާލީ ގޮތުން ދަތިތަކާ ކުރިމަތިލާން ޖެހިފައިވާ ކަމަށާއި، އެހެންކަމުން މި ދަނޑިވަޅުގައި އެޓީމުން ނޭމާ އާއި މާޓިނޭޒް ހޯދަން ބޮޑު ޚަރަދެއް ކުރަން ބާސާއިން މި ދަނޑިވަޅުގައި ބޭނުންނުވާ ކަމަށެވެ. އޭގެ ބަދަލުގައި ބާސާއިންވެސް މަސައްކަތް ކުރަމުން އަންނަނީ ލީގު އަލުން ފެށުމަށް ކަމަށް ވަނީ ބުނެފައެވެ.

ކޮވިޑް-19 ގެ އަސަރު ބާސާ އަށް ކޮށްފައިވާއިރު، މީގެ ކުރިން ބާސާ އިން ވަނީ ކުޅުންތެރިންގެ އެދުމުގެ މަތިން، ކުޅުންތެރިންގެ މުސާރައިން 70 އިންސައްތަ އުނިކުރަން ނިންމާފައެވެ.

ކޮވިޑް-19 އާ ގުޅިގެން ސްޕެނިޝް ލީގުގެ މެޗުތައް މުއްދަތެއް ނެތް ގޮތަށް ފަސްކޮށްފައިވާއިރު، ލީގުގެ ކުޅުން މެއި މަހުގެ ފަހުކޮޅު ފަށަން މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.