ފިނޭންސް މިނިސްޓަރ އަމީރަށް އިތުބާރު ނުކުރައްވާ ކަމަށް ބޮންޑާ ވިދާޅުވެއްޖެ
25 އެޕްރީލު 2020 | ހޮނިހިރު 17:25ހަމަ ކުއްލިއަކަށް 4.2 ބިލިއަން އިތުރުކޮށްދޭން އެދިލެއްވުމަކީ ޒިންމާދާރު ގޮތެއް ނޫން
މާފަންނުމެދު ދާއިރާގެ މެމްބަރު އިބްރާހީމް ރަޝީދު
ފިނޭންސް މިނިސްޓަރ އިބްރާހީމް އަމީރުއަށް އިތުބާރުނުކުރައްވާކަމަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ވިދާޅުވެއްޖެ އެވެ.
ކޮވިޑް-19 އާ ގުޅިގެން އަންނަ އިޤްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ 4.2 ބިލިއަން ރުފިޔާ އިތުރު ކޮށްދިނުމަށް ރައްޔިތުންގެ މަޖިލީހަށް ފިނޭންސް މިނިސްޓަރ އަމީރު ހުށަހަޅުއްވާފައިވާ މައްސަލައަށް ބަހުސް ކުރައްވަމުން ބޮންޑާ ވިދާޅުވީ، ކުރު މުއްދަތެއްގައި ޚަރަދުކުރަން ފައިސާ ހޯއްދަވަން ބޭނުންފުޅުވާކަމަށް ވިދާޅުވާއިރު، ކުރުމުއްދަތެއްގައި ކުއްލި ކުއްލިއަށް ބަދަލު ދިނުންފަދަ ކަންކަން މާޒީގައި ހިނގާފައިވާތީ ފިނޭންސް މިނިސްޓަރަށް އިތުބާރު ނުކުރެއްވޭކަމަށެވެ.
މީގެއިތުރުން ބޮންޑާ ވިދާޅުވީ، ދައުލަތުގެ މާލިއްޔާއަކީ ރައްޔިތުންގެ ފައިސާ ކަމަށެވެ. އަދި މިހާބޮޑެތި އަދަދަތަކެއްގެ ފައިސާ ޚަރަދު ކުރުމަށް ނިންމާއިރު، ރައްޔިތުންނަށް ލިބެނީ ކޯއްޗެއްތޯ ވިދާޅުވެ ބޮންޑާ ވަނީ ސުވާލު އުފައްދަވާފަ އެވެ.
ބޮންޑާ ވިދާޅުވީ ކުއްލިއަކަށް، ކޭޝްފްލޯ އިތުރުކުރަން މަޖިލީހަށް ހުށަހެޅުމަކީ ވަރަށް ޒިންމާދާރުކަން ކުޑަ އަމަލެއް ކަމަށާއި، ދައުލަތުގެ ފައިސާއަކީ ހަމަ ރައްޔިތުންގެ ފައިސާއަށްވާއިރު، މަޖިލީހުން މި ހުއްދަދޭއިރު، ވަރަށް ބޮޑަށް ވިސްނަންޖެހޭ ކަމަށެވެ.
ބޮންޑާ ވަނީ ކޮވިޑް-19 އާގުޅިގެން ސަރުކާރުން ކަނޑައެޅި އިކޮނޮމިކް ރިކަވަރީ ޕެކޭޖް، ފަހުން ސިޓިމިއުލަސް ޕެކޭޖަށް ބަދަލުވެ، އަދި މިހާރު އެޕޭޖް ރިލީފް ޕެކޭޖަކަށް ބަދަލުވެގެން ގޮސްފައިވާ ކަމަށެވެ. އެހެންކަމުން ސަރުކާރުން އިގްތިޞާދީ ކަންކަމުގައި އަޅަމުންދާ ފިޔަވަޅުތަކާމެދު ބޮންޑާ ވަނީ ވަރަށް ބޮޑަށް ފާޑުވިދާޅުވެފަ އެވެ.
ބޮންޑާ ވިދާޅުވީ، 4.2 ބިލިއަން ރުފިޔާ ޚަރަދުކުރާއިރު، އެކަން ވަރަށް ގާތުން ރައްޔިތުންގެ މަޖިލީހުން ބައްލަވާ ދެއްވުމަކީ ވަރަށް ބޮޑަށް އެދިލައްވާ ކަމެއްކަމަށެވެ. ބޮންޑާ ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއަކީ ވެސް އޭނާ ވަރަށް ބޮޑަށް އިތުބާރު ކުރައްވާ ބޭފުޅެއް ކަމަށާއި ނަމަވެސް ކެބިނެޓްގައި ހިމެނޭ ގިނަ މިނިސްޓަރުންނަށް އިތުބާރު ނުކުރައްވާ ކަމަށެވެ.
