ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ޓީސީ ޓީމު ކަރަންޓީނުކުރި ރ. ފުރަވެރި ރިސޯޓުގެ އިންތިޒާމުތައް ވަރަށް ފުރިހަމަ ކަމަށް ޓީސީ ސްޕޯޓްސް ކްލަބަށް ކުޅެމުން އަންނަ ގައުމީ ޓީމުގެ ފޯވަރޑް އަލީ އަޝްފާގު (ދަގަނޑޭ) ބުނެފިއެވެ.

ކަރަންޓީނުގެ މުއްދަތު ފުރިހަމަ ކޮށް، ހުކުރު ދުވަހުގެ ވަގުތެއްގައި ޓީސީ ޓީމު މާލެ ގެނައިރު، އެ ޓީމުގެ ކުޅުންތެރިންނާ އޮފިޝަލުން ވަނީ ކަރަންޓީނުގައި ޖުމުލަ 42 ދުވަސް ހޭދަކޮށްފައެވެ.

ރާއްޖެ ނާދެވިފައި ތިބި ދިވެހިން ގެނައުމަށް ގައުމީ އެއަރލައިން މޯލްޑީވިއަނުންކުރި ހާއްސަ ދަތުރުގައި މި މަހުގެ 5 ވަނަ ދުވަހު ޓީސީ ޓީމު މާލެ ގެނައިރު، ޓީމުގެ ހުރިހާ ކުޅުންތެރިންނާއި އޮފިޝަލުން ކަރަންޓީނުކުރި ފުރަވެރި ރިސޯޓުގައެވެ.

ކަރަންޓީނުން ދޫކޮށްލުމުން ދަގަނޑޭ ކުރި ޓްވީޓެއްގައި ބުނެފައިވަނީ ކަރަންޓީނުގެ އިންތިޒާމުތައް ވަރަށް ފުރިހަމަ ކަމަށެވެ. އަދި އޭނާ ވަނީ އެކަމަށްޓައި ސިއްހީ ޚިދުމަތްތެރީންނާއި އެކަމުގައި ޝާމިލްވީ އެންމެންނަށް ޝުކުރު އަދާކޮށްފައެވެ.

ހުކުރު ދުވަހުގެ ވަގުތެއްގައި ޓީސީ ޓީމު ކަރަންޓީނުން ދޫކޮށްލިއިރު، އެޓީމުގެ ހުރިހާ ކުޅުންތެރިންނާއި އޮފިޝަލުން ވަނީ ކޮވިޑް-19 އަށް ޓެސްޓުކޮސްފައެވެ. އަދި ޓީސީގެ ހުރިހާ ކުޅުންތެރިންނާއި އޮފިޝަލުންގެ ޓެސްޓުތައް ނެގެޓިވްވެފައިވާ ކަމަށް އެ ކްލަބުން ވަނީ ބުނެފައެވެ.

އޭއެފްސީ ކަޕުގައި ބަޝުންދުރާ ކިންގްސްއާ ދެކޮޅަށް ކުޅުމަށް ޓީސީ ޓީމު ބަންގްލަދޭޝްއަށް ދިޔުމުން، ރާއްޖެ އައުމުގެ ކުރިން އެންމެ ފުރަތަމަ ޓީސީ ޓީމު ކަރަންޓީނު ކޮށްފައިވަނީ ސްރީލަންކާގައެވެ. އެގޮތުން ލަންކާގައި ޓީސީ ކަރަންޓީނު ކުރީ މިދިޔަ މާޗު މަހުގެ 12 ވަނަ ދުވަހު އެވެ.

ކަރަންޓީނުގެ މުއްދަތު ފުރިހަމަކޮށް، ޓީސީ ޓީމުގެ ކުޅުންތެރިން މާލެ ގެނައިރު، މާލެ ވަނީ އެއްކޮށް ލޮކްޑައުން ކޮށްފައެވެ. އަދި ކޮވިޑް-19 އާ ގުޅިގެން ފުޓްބޯޅައިގެ ހުރިހާ ހަރަކާތެއްވެސް ވަނީ މެދުކަނޑާލާފައެވެ. އެގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މީގެ ކުރިން ވަނީ 2019/2020 ވަނަ އަހަރުގެ ފުޓްބޯޅަ ސީޒަންގެ ބާކީބައި ކެންސަލް ކުރުމަށް ނިންމާފައެވެ.