ށ އަތޮޅު ނަރުދޫއިން ދިވެއްސަކު ކޮވިޑް-19 އަށް ޕޮޒިޓިވްވެއްޖެއެވެ.
އިތުބާރުހުރި މަސްދަރަކުން "ރާއްޖެއެމްވީ"އަށް ކަށަވަރު ކޮށްދެއްވާފައިވާ ގޮތުގައި މާލެއިން އެރަށަށް ދިޔަ ދިވެއްސެއްގެ ސާމްޕަލްގެ ނަތިޖާ ޕޮޒިޓިވްވެފައިވާ ކަމުގެ މައުލޫމާތު ހެލްތް ޕްރޮޓެކްޝަން އޭޖެންސީން އެ ރަށުގެ ކަމާބެހޭ ފަރާތްތަކަށް ވަނީ ހިއްސާކޮށްފައެވެ.
އެއާއެކު މާލެއިން ބޭރު ރަށަކުން ކޮވިޑް-19 ގެ ޕޮޒިޓިވް ކޭސްއެއް ފެނުނު 2 ވަނަ ރަށަކަށް ނަރުދޫ މިވަނީ ވެފައެވެ. އެގޮތުން މާލެއިން ބޭރު ރަށަކުން އެންމެ ފުރަތަމަ ކޮވިޑް-19 ގެ ކޭސްއެއް ފެނިފައިވަނީ ހއ އުލިގަމުންނެވެ.
ރާއްޖެއިން ފުރަތަމަ ކޮމިއުނިޓީ ސްޕްރެޑެއް ފެނިފައިވަނީ އޭޕްރީލް މަހުގެ 15 ގައެވެ.
ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅުތައް ވަރުގަދަ ކުރަމުންދާއިރު، ޓެސްޓު ކުރުމުގެ ކަންކަން އިތުރަށް ހަރުދަނާ ކުރުމަށްވެސް ދަނީ މަސައްކަތްތަކެއް ކުރަމުންނެވެ. އޭގެ އިތުރުން ޕޮޒިޓިވް ކޭސްތަކާ ގުޅުންހުރި މީހުން ފިޔަވައި އެކި ސަރަޙައްދުތަކުގައި "ކޮމިއުނިޓީ ސަރވައިލެންސް" ކުރިއަށް ގެންގޮސް، މާލެއާއި އަތޮޅު ތެރޭގައިވެސް ރިސްކް ބޮޑު ކަމަށް ފާހަގަވާ މީހުން ޓެސްޓް ކުރެވޭނެކަމަށް ހެލްތް މިނިސްޓްރީންވެސް ބުނެފައިވެއެވެ.
