ޝީޝާގެ މުވައްޒަފުންނަށް ރޯދަ މަހުގެ އިނާޔަތް ނުލިބޭނެ
25 އެޕްރީލު 2020 | ހޮނިހިރު 00:36މުސާރައަށް ވެސް ބަދަލުތަކެއް ވަނީ ގެނެސްފައި
ޝީޝާގެ ހެޑް އޮފީސް | ޝީޝާ
ރާއްޖޭގައި ފުޅާދާއިރާއެއް ސައިކަލްގެ ވިޔަފާރި ކުރަމުން އަންނަ ޝީޝާ ޕްރައިވެޓް ލިމިޓެޑުން މުވައްޒަފުންނަށް ރޯދަ މަހުގެ އިނާޔަތް ނުދޭން ނިންމައި އެކަން އެކުންފުނީގެ މުވައްޒަފުންނަށް އަންގައިފިއެވެ.
ޝީޝާއިން ނެރެފައިވާ ސާކިއުލާއެއްގައި ބުނީ، ކޮވިޑް-19 އާ ގުޅިގެން އިގްތިސާދީގޮތުން އަންނަމުންދާ ގޮންޖެހުންތަކާއިއެކު މި އޭޕްރީލް މަހުގެ 21 އިން ފެށިގެން ފިޔަވަޅުތަކެއް އަޅަން ހަމަޖެހިފައިވާ ކަމަށެވެ. އޭގެ ތެރޭގައި، މުވައްޒަފުންގެ މުސާރަ ކުޑަ ކުރުމާއި، ނޯޕޭލީވް އަށް ފޮނުވުމުގެ އިތުރުން ބައެއް އައުޓްލެޓްތަކާއި ޑިޕާރޓްމެންޓްތަކުން މުއައްޒަފުން މަދުކުރުން ހިމެނޭ ކަމަށެވެ.
އޭގެއިތުރުން ރަމަޟާން މަހުގެ އިނާޔަތް އެހެން އަހަރުތަކާއި ހިލާފަށް މި އަހަރު ނުދޭން ޝީޝާއިން ވަނީ ނިންމާފައެވެ. އެ ކުންފުނިން ނިންމާފައިވާ ނިންމުންތަައް ހުރިހާ މުވައްޒަފުން ބަލައިގަންނާނެ ކަމަށް އުއްމީދުކުރާ ކަމަށް ޝީޝާގެ ބަޔާނުގައި ބުންޏެވެ.
ވަޒީފާއާ ބެހެ ގާނޫނު ބުނާ ގޮތުން މުސްލިމް ކޮންމެ މުވައްޒަފަކަށް ރޯދަ މަހުގެ އިނާޔަތުގެ ގޮތުގައި 3000 ރުފިޔާ ދޭން ޖެހޭނެއެވެ.
ކޮވިޑް-19 އާ ގުޅިގެން ބައެއް ކުންފުނިތަކުން ދަނީ އެ ކުންފުނިތަކުގެ މުސާރައިގެ އޮނިގަނޑަށް ބަދަލުތަކެއް ގެނެސް ގިނަ އަދަދެއްގެ ބަޔަކު ވަޒީފާއިން ވަކި ކުރަމުންނެވެ. އެފަދަ މައްސަލަތައް ހުށައެޅުމަށް އިކޮނޮމިކް މިނިސްޓްރީން ގާއިމް ކޮށްފައިވާ ޖޮބް ޕޯޓަލް އަށް މިހާތަަނަށް 400 އަށްވުރެ ގިނަ މައްސަލަތައް ވަނީ ހުށައެޅިފައެވެ.
