ކޮންމެ އަހަރަކު ރަމަޟާންމަހު އިސްލާމިކް ޔުނިވަރ ސިޓީ (އައިޔޫއެމް) އިން ބާއްވާ ޤުރުއާން މުބާރާާތް މިއަހަރު އޮންލައިން ކޮށް ބާއްވަން ނިންމައިފިއެވެ.
އައިޔޫއެމްގެ ސްޓޫޑަންޓް ޔޫނިއަންއިން އިންތިޒާމްކޮށްގެން ބާއްވާ 1441 ރަމަޟާންމަހުގެ މިޤުރުއާން މުބާރާތް ހޮނިހިރު ދުވަހު ފަށާގޮތަށް ހަމަޖެހިފައިވާ ކަމަށް އައިޔޫއެމްއިން ބުނެއެވެ.
އައިޔޫއެމްއިން ބުނީ މި މުބާރާތް ކުރިއަށްދާނީ ސްޓޫޑަންޓް ޔޫނިއަން ފޭސްބުކް ޕޭޖު މެދުވެރިކޮށް ކަމަށާއި، މުބާރާތް ކުރިއަށް ދާނީ ދެ ބުރަކަށް ބަހައިލައިގެން ކަމަށެވެ.
އައިޔޫއެމުން ބުނީ ކޮންމެ ބުރެއްގައިގައި ވެސް ބައިވެރިވާ ދަރިވަރުން ކިޔަވަން ވާނީ ގަވާއިދުގައިވާ 6 ރާގުގެ ތެރެއިން ދަރިވަރަކު ބޭނުން އެއްރާގަށް ކަމަށެވެ. އެއްވެސް ދަރިވަރަކަށް ތަކުރާރުކޮށް އެއްރާގެއް ދެބުރުގައި ބޭނުން ނުކުރެވޭނެކަން ފާހަގަކޮށް އައިޔޫއެމުން ބުނީ ކޮންމެ ބުރެއްގެ ކިޔެވުން ހުށަހެޅުމުގެ ކުރިން އެދަރިވަކު ކިޔަވާ ރާގު ސާފުކޮށް އަންގަންޖެހޭ ކަމަށެވެ.
އައިޔޫއެމުން ބުނީ ކޮންމެ ބުރަކަށް ވެސް ކިޔަވަން ޖެހޭ މިންވަރު ގަވާއިދުގައި ކަނޑައެޅިފައިވާ ކަމަށާއި، ދެވަނަ ބުރުގައި ބައިވެރިވެވޭނީ ފުރަތަމަ ބުރުން ހޮވޭ ދަރިވަރުން ކަމަށެވެ.
މީގެ އިތުރުން އައިޔޫއެމުން ބުނީ މުބާރާތުގައި ފުރަތަމަ ބުރަށް ވީޑިއޯ ހުށަހެޅުމުން މުބާރާތުގައި ބައިވެރިވެވޭނެ ކަމަށެވެ. އަދި ވީޑިއޯ ހުށަހަޅާއިރު ދަރިވަރުގެ ނަމާއި ސްޓޫޑެންޓް އައިޑީ ޖެހުމަށްފަހު ދަރިވަރުންގެ ގުޅުމުގެ ފޭސްބުކް ޕޭޖް ޓެގް ކުރަންވާނެ ކަމަށެވެ.
ކޮންމެ ބުރެއްގައި ވެސް ވީޑިއޯ ހުށަހެޅުމަށް 12 ދުވަހުގެ މުއްދަތެއް ދެވޭނެ ކަމަށް އައިޔޫއެމުން ބުނެއެވެ.
